VIDEO: COP 24Accord fonnt an Text adaptéiert! Weltklimakonferenz ofgeschloss

Et gëtt een Accord , dat nodeems 197 Staaten déi lescht zwou Wochen nach eemol intensiv un engem Text vun iwwer 100 Säite geschafft hunn

Accord fonnt an Text adaptéiert! Weltklimakonferenz ofgeschl (16.12.2018)
Et gëtt een Accord , dat nodeems 197 Staaten déi lescht zwou Wochen nach eemol intensiv un engem Text vun iwwer 100 Säite geschafft hunn.
Et ass ee Reegelwierk, dat déi lescht dräi Joer no der Klimakonferenz vu Paräis ausgeschafft gouf, wou et virop ëm déi juristesch an technesch Ëmsetzung vun de Paräisser Ziler geet. Engersäits geet et ëm d'Fro vum Mechanismus, wéi Finanzhëllefe vun den Industrielänner un d'Entwécklungslänner fléissen an anerersäits ëm d'Fro vun der Begrenzung vun der Äerderwiermung op maximal 2 Grad Celsius an d' Erofsetze vun den Zäregasen.

Den Tweet vum Carole Dieschbourg


© Lëtzebuerger Delegatioun

Ziler zu Paräis, d'Reegelen zu Katowice

D'Schwieregkeet war et bei dëse Verhandlunge Kritären ze fannen, déi fir di ganz Welt vergläichbar sinn. Ziler huet een zu Paräis definéiert, zu Katowice ass et elo drëms gaangen déi nämmlecht Moossstief ze definéieren, fir d'Ziler ze erreechen.
E konkret Beispill verdäitlecht et: D' Industriestaaten hunn Donnéë vun den Emissiounen a kënnen esou genee soen, wéi se Zäregase reduzéieren. A villen Entwécklungslänner mussen elo mol Donnéë gesammelt ginn a vergläichbar gemaach ginn.

D'Negociatioune goufen elo nach emol ëm iwwer 24 Stonne verlängert, dat well Staate wéi d'USA, Kuwait, Saudi-Arabien a Russland Verhandlungen ausgebremst hunn, esou Beobachter um Bord vun der COP 24.

Um Samschdeg den Owend war aus EU-Kreesser ze héieren, dass Brasilien d'Ofschlossdokument net mat géif droen, dat wéint dem internationalen Handel vun Emissiounszertifikater.

© Lëtzebuerger Delegatioun


Ambitiéis Koalitioun vu Staaten

E Freideg den Owend ass eng Koalitioun vun 107 Staaten virun d'Press getrueden, déi sech 2015 zu Paräis zesummefonnt hat. Si hu sech staark gemaach, dass d' 1,5 Grad-Celsius-Zil an den Text opgeholl gëtt. 

Duerno war et dann och de Message, fir d'Ambitiounen nach emol e bëssen eropzeschrauwen an ënnert anerem de Rapport vum Weltklimarot an den neien Text mat opzehuelen. An déi Diskussiounen hunn d’ganz Nuecht iwwer gedauert.

Am definitiven Text ginn d'Länner elo invitéiert, de Rapport vum Weltklimarot zur Kenntnis ze huelen. Dëst nëmmen ee vun de Kompromësser, deen déi lescht Stonnen ausgehandelt gouf.

RTL NEWS - Cop24: Privatwirtschaft mobiliséieren, fir méi a gréng Finanzen z'investéieren

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.