13. Protestdag a FrankräichEen "Gilet jaune" huet seng Hand verluer

Zu Paräis op der Plaz virum Parlamentsgebai koum et e Samschdeg zu Affrontementer tëscht de Manifestanten an der Police.

13. Protestdag a Frankräich (09.02.2019)
Zu Paräis op der Plaz virum Parlamentsgebai koum et e Samschdeg zu Affrontementer tëscht de Manifestanten an der Police.

3 Méint nodeems de Mouvement "Gilets jaunes" lancéiert gi war, war et e Samschdeg déi 13. Protestaktioun a Frankräich. Ënnert anerem zu Paräis, Bordeaux, Toulouse a Lyon waren d'Gilets jaunes ënnerwee.

Zu Metz waren eng 1.900 Leit op der Strooss an e Samschdeg den Owend ass d’Situatioun do liicht eskaléiert. E puer honnert Manifestanten hate géint 17 Auer probéiert eng Police-Spär ze duerchbriechen. D’Police huet Gummigeschosser an Tréinegas agesat.

Am Zentrum vu Metz hunn d'Casseuren doropshin d’Vitrinnen vu Butteker futtigeschloen a Bränn geluecht, mellen d’Kollegen vu France Bleu. 5 Leit wiere festgeholl ginn.

Nieft 4 Gendaarmen goufen zu Metz och zwee Gilets jaunes blesséiert an d’Spidol ageliwwert.

An der Haaptstad Paräis koum et iwwer Mëtteg zu Randaler virun der Assemblée nationale, de Cortège huet sech duerno awer weider bis virun de Senat beweegt gehat.

Bei den Affrontementer gouf ee Mann schwéier blesséiert. Hien huet bei deem Tëschefall seng Hand verluer. Dat huet d'Police um Samschdeg de Mëtteg confirméiert.

LINK: Méi iwwer den Tëschefall zu Paräis bei de Kollege vum 5minutes.rtl.lu.

D'Sécherheetsbeamte sollen eng Blendgranat op d'Manifestante gehäit hunn. De Mann, deen e Fotograf vun de giele Gilete soll sinn, huet déi du versicht ewechzewerfen an hat se dofir an d'Hand geholl. Grad dee Moment ass d'Granat explodéiert an huet dem Mann d'Hand ewechgerappt.




21 Persoune goufen der Prefekture no festgeholl. Verschidden Demonstranten hätte versicht, an d'Gebai eranzekommen. D'Forces de l'ordre hunn dofir mat Tréinegas op d'Manifestante geschoss.



Zu enger 12.000 solle si e Samschdeg de Mëtteg vu 14 Auer un queesch duerch Frankräich ënnerwee gewiescht sinn. Eleng an der franséischer Haaptstad wiere 4.000 Gilets jaunes op d'Strooss gaang.

Dat sinn d'Zuele vum franséischen Inneministère. Domadder wiere manner Manifestanten op de Stroosse gewiescht wéi nach déi Woch virdrunner. Do waren et ëm déi selwescht Zäit iwwert 17.000 Leit. Iwwert de ganzen Dag allerdéngs waren et d'lescht Woch 58.000 Persounen, déi sech mobiliséiert haten.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.