Trump-Pressekonferenz"Hacker-Attack am US-Wahlkampf koum wuel aus Russland"

Wat d'Hacker-Attack am Laf vum US-Wahlkampf ugeet, sot den Trump dass deen Ugrëff wuel aus Russland koum.

Russland huet Berichter vun US-Medien zeréckgewisen, deenen no de Kreml am Besëtz vu brisanten Informatiounen iwwert den zukünftege President Trump wier. Hei géif et sech ëm falsch Informatiounen handele mam Zil de Relatiounen tëscht Moskau a Washington ze schueden.

Den Trump nennt déi Berichter komplette Blödsinn.

Op enger Pressekonferenz huet hie vu „Fake-News“ geschwat. Wat d'Hacker-Attack am Laf vum US-Wahlkampf ugeet, sot den Trump dass deen Ugrëff wuel aus Russland koum.

Wat säi politesche Programm betrëfft, huet hien den Amerikaner Brout a Loun versprach. Hie wier de gréisste Createur vun Aarbechtsplaze ginn, dee Gott jee geschaaft huet.

Wat seng Geschäfter betrëfft, géif et keen Interessekonflikt ginn, well seng Filsen iwwerhuelen an déi dat wäerte maachen, ouni d'Geschäfter mat him ze bespriechen.

Den Trump gouf och op d'Publikatioun vu senger Steiererklärung ugeschwat, déi hien nach schëlleg ass . D'Äntwert war, dass d'Amerikaner sech net dofir géifen interesséieren.

Dernieft huet den Trump gesot, d'Mauer op der Grenz zu Mexiko géif gebaut ginn. An zwar esou séier wéi méiglech. Den designéierten amerikanesche President sot, dass een net wéilt waarde bis d'Verhandlungen ofgeschloss sinn, mä dass direkt ugefaange gëtt, mat bauen, soubal hie President ass. Op iergendeng Manéier wäert Mexiko den USA d'Käschte fir d'Mauer zeréckbezuelen, sou nach den Donald Trump.

Mexiko huet awer net wëlles, fir dem zukünftegen amerikanesche President Donald Trump seng geplangte Mauer laanscht d'Grenz ze bezuelen. Dat sot de mexikanesche President Enrique Peña Nieto op der Joresversammlung vun den diplomatesche Corpsen zu Mexiko-City.


Obama-Ccare wär eng Katastroph, hie wëll d'Gesondheetsreform ersetzen, en neit Gesetz maachen.

Vill Neits gouf een ënnert dem Stréch an der Pressekonferenz net gewuer. Presidentiell huet den Donald Trump sech (nach) net presentéiert. An 9. Deeg, den 20. Januar ass seng Vereedegung.

Dem Donald Trump seng éischt Pressekonferenz gëscht suergt fir sou muench Reaktiounen. Hien hat refuséiert, op eng Fro vun engem Journalist vu CNN ze äntweren. Doropshin ass an den USA eng Diskussioun iwwert den Ëmgang mat der Pressefräiheet am Trump senger zukünfteger Regierung ausgebrach. CNN hat do virdru gemellt, dass den Donald Trump a verschidden Affären a Russland verwéckelt wier.

Zukünftegen Ausseminister widdersprécht Trump

Den designéierten amerikaneschen Ausseminister Rex Tillerson ass net an allem där selwechter Meenung, wéi säin zukünftege Chef. Am Senat huet hien e Mëttwoch während engem Hearing a ville Punkten dem zukünftege President widdersprach.

Nodeems hie sech kritesch iwwer Russland geäussert huet a Versteesdemech gewisen huet, fir d'Suerge vu verschiddenen NATO-Partner huet de Rex Tillerson och bei de Sujete Klimaschutz a Fräihandel aner Positioune vertrueden wéi den Donald Trump.

De Chef vum Pëtrolskonzern ExxonMobil vu bis elo huet sech och géint een neit nukleaart Oprëschten ausgeschwat. Beim Thema Klimawandel huet hie fir eng Suite vum internationalen Dialog plädéiert. Den Trump hat nach während dem Wahlkampf gesot, dass hien de Paräisser Klimaaccord wéilt kënnegen.
Dem Rex Tillerson no sollten d'USA hir Plaz um Verhandlungsdësch behalen, fir eng weltwäit Äntwert op d'Menace vum Klimawandel ze fannen.

Och wat de Fräihandelsaccord TTIP betrëfft, géif hien dësen net refuséieren, sou nach den zukünftegen Ausseminister.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.