EU-KommissiounKeng zweet Mandatsperiod fir de Jean-Claude Juncker

De Lëtzebuerger Politiker huet am Däitsche Radio nach eng Kéier widderholl, datt hie sech net nach eng Kéier fir en europäesche Poste géif opsetzen.

De Jean-Claude Juncker wëll net fir eng zweet Mandatszäit un der Spëtzt vun der EU-Kommissioun untrieden, dat huet de Kommissiounspresident, der Noriichtenagence AFP no, an engem Interview mam Deutschlandfunk gesot a confirméiert domadder ähnlech Aussoen géintiwwer der Lëtzebuerger Press, dorënner RTL. Den 8. Oktober hat de laangjärege Premier bei eis am Background gemengt, eng europäesch Carrière géif duergoen. Hie hätt net wëlles eng zweet ze maachen.

Extrait Jean-Claude Juncker aus dem Backround vum 8. Oktober



Am Mee zejoert schonn hat den CSV-Politiker am Kader vum 40. Anniversaire vun der EVP duerchblécke gelooss, datt d'EVP bei den nächste Wahle wuel net méi mat him als Spëtzekandidat géif untrieden. Elo ass et dann definitiv. De Jean-Claude Juncker huet am November 2014 d’Spëtzt vun der EU-Kommissioun iwwerholl.

Hien hätt sech an der leschter Walcampagne nees nei an Europa verléift, sou de Jean-Claude Juncker am Deutschlandfunk, well en nees nei entdeckt hätt, wéi faarweg d'Europäesch Unioun ass. De Wahlkampf wier schéi gewiescht, ma en hätt deemools scho gemierkt, datt et e "Grondaverständnis" feelt iwwert déi Saachen, déi an Europa ze leeschte sinn. Déi eng Länner hätte gär méi Europa, anerer géife fannen, datt et elo schonn ze vill Europa gëtt, gëtt den experimentéierten Europapolitiker zitéiert.

Am Interview dréckt de Jean-Claude Juncker awer seng Zweiwel driwwer aus, ob déi 27 Memberlänner et fäerdeg brénge kënnen, bei de Brexit-Verhandlunge mat enger Stëmm ze schwätzen. Hie wier sech net sou sécher, ob elo déi grouss Stonn vun Europa komm wier. Vill méi wier ze fäerten, datt d'Briten et fäerdeg bréngen, ouni vill Méi déi aner 27 auserneen ze dividéieren.

Säin aktuellt Mandat leeft nach bis den 1. November 2019. An deem Joer sinn am Juni d'Europawahlen.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.