EU-Prozedur géint PolenPresident Duda onbeandrockt, 2 weider Justizrefomen ugeholl

No zwee Joer am Sträit mat Polen hat d'Europäesch Kommissioun e Mëttwoch iwwer Strofmesurë géint d'EU-Memberland beroden.

Déi nationalkonservativ Regierung hätt am Ganzen 13 Gesetzer ugeholl, déi eng „serieux Gefor fir d'Onofhängegkeet vun der Justiz“ wären, sot an der Mëttegstonn den EU-Vizekommissiounspresident Frans Timmermans. D'Kommissioun geet och virun den Europäesche Geriichtshaff.

D'Kommissioun wär dee Schratt schwéieren Häerzens gaangen, sou den Timmermanns. D'Kommissioun wär awer derzou verpflicht ze handelen, wann d'Rechtsstaatlechkeet an engem Memberstaat eng Gefor wier.

Sou eng Prozedur ass nach ni géint e Memberland ageleet ginn. Fir Sanktioune brauch et awer een eestëmmegen Accord. Déi ungaresch Regierung huet awer schonn e Veto annoncéiert.

Bréissel weist sech weider oppe fir en Dialog.

Polen léisst sech net intimidéieren

Kuerz nodeems d'EU-Komissioun e Mëttwoch decidéiert hat eng Prozedur fir Strofmesuren géint d'Land ze entaméieren, sinn zwou weider ëmstridde Justizreformen a Kraaft getrueden. De President Andrzej Duda huet zwou Reformen ënnerschriwwen, déi dat Iewescht Geriicht an de Justiz-Conseil vum Land concernéieren.

"Mir féieren a Polen ganz gutt Léisungen an, fir d'Justiz méi effizient ze maachen", sou den Duda e Mëttwoch den Owend an enger Televisiounsusprooch. Den demokratesche Charakter vum Justizsystem géif doduerch gestäerkt ginn. Déi polnesch Oppositioun an d'EU gesinn an dëse Gesetzesännerungen dogéint eng Restriktioun vum Rechtsstaat a vun der Gewaltentrennung. Nom neie Gesetz ginn déi 15 Riichter vum Justiz-Conseil net méi wéi bis elo vun anere Riichter gewielt, mä vun enger Dräivéirel Majoritéit vum Parlament.

Artikel 7

Bréissel gesäit nämlech an de Justizreform vun der nationalkonservativer Regierungspartei PiS eng Gefor fir d'Rechtsstaatlechkeet an domat fir d'Grondwäerter vun der Europäescher Unioun.

Zur Debatt steet fir d'éischte Kéier eng Prozedur no Artikel 7 vun den EU-Verträg. Dës gëllt als schäerfste Mesure géint Memberlänner a kann dozou féieren, dass dat betraffent Land säi Stëmmrecht ewechgeholl kritt, wann all déi aner EU-Länner dofir sinn.

Déi polnesch Regierungspartei hat an de leschten Deeg en zweet Gesetz an d'Parlament bruecht, mat dem dat Iewescht Geriicht an de Justiz-Conseil vum Land solle reforméiert ginn. Just d'Ënnerschrëft vum President Andrzej Duda feelt nach. Justizexperte kritiséieren, dass de PiS domat nach méi Afloss op d'Riichter an d'Geriichter kritt.

A Polen ass et am Moment esou, datt d'Justiz dem Staat an der politescher Majoritéit komplett ënnerjocht gëtt. Wat dozou féiert, datt de Justizminister quasi selwer en Mesure ass, fir Uerteeler, wann och net ze spriechen, dann awer z'orientéieren. Dat si Saachen, déi ginn net, esou de Frank Engel.



Dofir hat d'Kommissioun vum Jean-Claude Juncker schonn am Januar 2016 d'Gespréich mat Polen gesicht, ouni Succès. Et misst een déi polnesch Regierung deemno mat anere Mëttelen dorun erënneren, dass se Verträg ënnerschriwwen hunn. An déi géife se zu anerem verflichten. Op eng Prozedur um Ënn och effikass wär, dat kann den Frank Engel awer net soen.

Pole gëtt quasi vun engem Mann regéiert, dee fir sech selwer eng "messianesch" Missioun gesäit. An zwar fir dat kathoulescht, konservatiivt, provinziaalt d'Polen der Globaliséierung entgéint ze stellen. Hie wier och bereet, am Fall vu Sanktiounen, iergendwann e Referendum ze maachen, wou iwwer d'Verbleiwen an der EU soll ofgestëmmt ginn. Hie géif an deem Fall Campagne fir den Austrëtt maachen, sou de Lëtzebuerger Europadeputéierten.

Den däitschen EU-Kommissär Günther Oettinger huet drop higewisen, dass vill drop hindeit, dass den Artikel 7 eng éischte Kéier applizéiert gëtt. Et wär eng Eskalatioun am Sträit mat der rietskonservativer Regierung zu Warschau, sot den däitschen EU-Kommissär am Interview mat der ARD. Eng Prozedur nom Artikel 7 géint Polen wär d'Atomwaff am Arsenal vun der EU. En inakzeptabele Verglach, seet de Frank Engel.

Et wier en däemlechen Ausdrock, seet den CSV-Europa-Deputéierten, fir den Artikel 7 mat enger Atomwaff ze vergläichen. Et ass deen eenzege Moyen, deen d'EU huet, an deen ass och am Vertrag virgesinn. Et kann och zu kengen Ëmstänn, wat de Frank Engel bedauert, dozou féieren, datt ee Staat aus der EU ausgeschloss gëtt. De betraffene Staat kann  héchstens d'Stëmmrechter am Conseil verléieren.

Och déi polnesch Regierung geet vu sou enger Prozedur aus. Un hire Justizreformen hält se trotzdem weiderhi fest. Dës wieren dréngend néideg, huet den neie polnesche Premier Uganks vun der Woch gesot. Polen géif sech net op d'Knéie setzen, fir Bréissel ze froen, ob d'Land seng Justiz duerf reforméieren. De Politiker hofft, dass Warschau a Bréissel, och am Fall vun enger Prozedur, eng Basis fannen, fir kënnen zesummenzeschaffen. Am Januar wëll de polnesche Premier mam EU-Kommissiounschef Jean-Claude Juncker iwwert d'Gesetz schwätzen.

Artikel 7 géint Polen? / Reportage Frank Engel



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.