Asselborn am "Spiegel""De Sebastian Kurz schwätzt d'Sprooch vum Donald Trump"

Esou reagéiert de Lëtzebuerger Ausseminister Jean Asselborn an engem Interview mam "Spiegel" op d'Politik vum neien éisträichesche Kanzler.

© AFP (Archiv)
Et geet dobäi ëm d'Usiicht vum Kurz, dass all Land just esou vill Flüchtlinge soll ophuelen, wéi et selwer wëll ... "Wien esou schwätzt, versteet awer d'Eemoleent vun der Europäescher Unioun net: de Grondgedanke vun der Solidaritéit", seet de Jean Asselborn.

Wann mer mëttlerweil Polen oder Ungarn als Referenz géifen huelen, da wiere mer déif gefall.

Den Ausseminister kritiséiert am Interview och de Fait, dass sech 6 EU-Länner beim Vott an der UNO enthalen hunn, wat déi US-amerikanesch Initiativ ugeet, fir Jerusalem als Haaptstad vun Israel unzëerkennen. Eng eenheetlech Linn an der Unioun géif et also net ginn. Domadder géif d'EU aussepolitesch zu engem Zwerg ginn ...

Manner Asyl-Demanden an Europa

D'Zuel vun Demanden op Asyl ass dëst Joer an der EU iwwregens zeréckgaangen. Dat schreiwen um Samschdeg d'Zeitunge vun der däitscher Funken-Medien-Gruppe a beruffe sech op Zuele vun Eurostat. Deemno gouf et an den éischten 9 Méint vum Joer, tëscht Januar an Enn September, 479.650 Asyl-Demanden – dat ass 50% manner wéi am selwechten Zäitraum 2016.

Déi meescht Ufroe gëtt et weiderhin an Däitschland virun Italien. Ronn 62% vun den Demandë ginn an der Suitte gutt geheescht.

Asselborn proposéiert Schneider als LSAP-Spëtzekandidat

Am Jores-Interview mam Lëtzebuerger Wort vum Samschdeg huet de Jean Asselborn iwwerdeems op en Neits confirméiert, dass hie bei de Chamberswahlen am Hierscht d'nächst Joer nach eemol wëll untrieden. Spëtzekandidat vun der LSAP wéilt hien awer net ginn – hei géif hien, wa seng Meenung gefrot wier, den Etienne Schneider proposéieren.

- - -

Léif User,
Merci fir Är Commentairen. Onofhängeg dovun, ob een den Aussoe vum Jean Asselborn zoustëmmt oder net, Kritik soll fundéiert sinn. Einfach Frechheete ginn net online. Ausserdeem ass et net ganz konsequent, dem Minister ze reprochéieren, wéi e sech äussert, wann een da selwer op e graffen a beleidegende Vocabulaire zeréckgräift. Respektéiert w.e.g. d'Netikett. Merci fir Äert Versteesdemech an e gudden, rouegen, friddleche Rutsch gewënscht!
RTL.lu

- - -

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.