Jan KuciakJuncker schockéiert iwwer Mord u slowakeschem Journalist

Den EU-Kommissiounspresident Jean Claude Juncker huet sech schockéiert gewisen iwwert de Mord vum Journalist Jan Kuciak an der Slowakei.

© AFP
Et wier en feig Dot. Ëmbréngen oder Aschüchtere vu Journalisten huet keng Plaz an Europa an an kenger Demokratie, sou de Kommissiounschef.

De Journalist Kuciak a seng Verloobte goufen doheem erschoss. D'Police gesäit en Zesummenhank mat senger Aarbecht, déi speziell de Steierbedruch viséiert.

Den Ament hat hien iwwer méiglech Relatiounen tëscht dubiéise Geschäftsleit, organiséierter Kriminalitéit an de Sozialdemokrate recherchéiert, déi den Ament an der Slowakei um Pouvoir sinn.

Stécht déi italienesch Mafia hannendrun?
Hannert dem duebele Mord un engem slowakeschen Investigatiounsjournalist a senger Verloobte kéint en Netzwierk vun der italienescher Mafia stiechen. Dat melle slowakesch Medien e Mëttwoch de Moien. De leschte Reportage vum Jan Kuciak sollt anscheinend dëst komplizéiert Netzwierk, mat Relatiounen bis zu den héchste slowakesche Regierungsmemberen, devoiléieren. Den Text, deen nach net ganz fäerdeg war, hunn e Mëttwoch de Moien direkt e puer slowakesch Medie publizéiert.

Dem Jan Kuciak senge Recherchen no, hate sech presuméierte Membere vun der Mafia aus Kalabrien am Oste vun der Slowakei op Steierbedruch ëm gefälschte Rechnungen an EU-Subventiounen spezialiséiert. Sollten dës Recherche stëmmen wier et der Mafia gelongen hir Verbindungsleit direkt bis an de Büro vum Premierminister Robert Fico ze schleisen an do Accès ze kréien zu de geheimste Staatsinformatiounen a Sécherheetsmesuren.