EurobarometerLëtzebuerg: Migratioun- a Logementsproblem besser geréieren

De Logementproblem preoccupéiert d’Lëtzebuerger am meeschten. Dat geet aus dem leschte Eurobarometer ervir, deen um Donneschdeg presentéiert gouf.

© Didier Weber/RTL

Dat well d'Präisser vun de Loyeren an d'Spekulatioune vu Wunnengen hei am Land drastesch zouhuelen. Weider Defise bleiwen d’Inflatioun an den Educatiounssystem. D’Flüchtlingskris an de Brexit iwwerdeems preoccupéieren d'Leit op europäeschem Niveau. Ënnert anerem, well de Brexit vill mediatiséiert gëtt.

Eurobarometer / Reportage Frank Elsen

De gréisste Wonsch vun de Lëtzebuerger ass eng gemeinsam europäesch Flüchtlingspolitik. Dowéinst sinn 80 Prozent vun de Lëtzebuerger fir zousätzlech Mesuren, fir de Migratiounproblem ze léisen. D’Majoritéit wëll dann och de Réfugiéen hëllefen. D’Lëtzebuerger géifen nees méi pro-europäesch Gefiller entwéckelen, betount den Direkter vun TNS-Ilres, Charles Margue.

D’Majoritéit vun de Lëtzebuerger wier awer géint eng Erweiderung vun der EU. Hei am Land preoccupéiert virun allem awer de Logementsproblem. Dat well dacks 3 Generatiounen aus enger Famill mussen hëllefen, fir eng Wunneng ze bezuelen.

An den EU-Memberlänner gëtt de Logement awer manner als e Problem ugesinn. Am meeschte Suerge maachen de Leit, déi am Eurobarometer gefrot goufen, de Chômage an de Gesondheetssystem. D'Fräiheet, fir ze reesen, den Euro an de Fridde ginn iwwerdeems an der EU am meeschten appréciéiert. Donieft ginn d’Fräihandelsaccorden, CETA an TTIP als positiv bewäert. E Chiffer, deen awer ze bedenken gëtt, ass datt 44 Prozent vun de Lëtzebuerger fir de Protektionismus sinn. Fir d'Yuriko Backes vun der Vertriedung vun der EU-Kommissioun zu Lëtzebuerg ass et kloer, datt ee sech och op europäeschem Niveau muss protegéieren, virun deloyale Praktiken, wéi a China. An deem Sënn wär dat och ze verstoen.

Een Drëttel vun de Lëtzebuerger fënnt, datt déi politesch Orientatioun vun der Unioun an déi richteg Richtung geet. D'Majoritéit gesäit dat allerdéngs anescht.



Dossier: 1 Joer Passivhaus: Bauen a wunnen ass méi komplex ginn



 

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.