EU-BëschofskommissiounÄerzbëschof Jean-Claude Hollerich ass neie President

De Lëtzebuerger Äerzbëschof gouf en Donneschdeg vun de Bëscheef zu Bréissel op hirer Fréijoersversammlung fir déi nächst 5 Joer op dee Poste gewielt.

De Jean-Claude Hollerich gëtt domat de Successeur vum Münchener Kardinol Reinhard Marx, deen no zwou Mandatsperioden net méi konnt erëmgewielt ginn. Hie stoung zanter 2012 un der Spëtzt vun der COMECE, déi 1980 an d'Liewe geruff gouf, ee Joer no den éischten Direktwahle vum Europaparlament.




An dëser Kommissioun sinn d'Bëschofskonferenze vun deenen 28 Memberlänner vun der Europäescher Unioun vertrueden. Dat permanent Sekretariat vun der Bëschofskommissioun huet hire Siège zu Bréissel. D'Bëscheef vun der COMECE kommen zwee Mol d'Joer fir hir Vollversammlung zesummen. D'Kommissioun observéiert an analyséiert politesch Entwécklungen an informéiert bannent der Kierch.

De Jean-Claude Hollerich, deen zanter 2011 Äerzbëschof vu Lëtzebuerg ass, léisst wéi gesot de Reinhard Marx um Presidenteposten of. Dësen huet an engem leschten Interview mat der kathoulescher Noriichtenagence KNA een nach méi intensiven Dialog an Europa gefuerdert. Besonnesch d'Kierche kéinten d'Basis vum Dialog fërderen, sou de Münchener Kardinol.