Emmanuel MacronLiberal Demokratie muss verdeedegt, den EU-Bierger méi agebonne ginn

De franséische President Macron fuerdert a senger Ried zu Stroossbuerg, dass méi kritesch an oppen misst iwwert d'EU mat de Bierger diskutéiert ginn.

© Frederick FLORIN / AFP

Déi liberal Demokratie muss verdeedegt ginn - dat huet de franséische President Emmanuel Macron en Dënschdeg de Moien an enger Ried virum Europaparlament zu Stroossbuerg betount. Bis zum Enn vun der Legislatur am Fréijoer 2019 misst een handfest Resultater areechen. Den Emmanuel Macron ass kuerz op seng Pläng fir eng Reform vun der EU an op d'Beräicher Finanzpolitik, digital Technologien, a Verbraucherschutz agaangen. Mee och an der Flüchtlingspolitik misst ee Léisunge fannen:

Den Emmanuel Macron iwwert d'EU-Flüchtlingspolitik

No de rezente Wahlsuccèse vun Euroskeptiker an Ungarn an an Italien, gesäit de franséische Staatschef dréngenden Handlungsbedarf. An der Plenière huet hie fir europäesch Finanzhëllef plädéiert, fir déi Länner déi Flüchtlingen ophuelen. Zil wier et, déi vergëften Debatten iwwer d'Dublin-Reegelen a d'Ëmverdeelung an der EU op dës Aart a Weis hannert sech ze loossen. Och eng intern an extern Solidaritéit, déi Europa bräicht, gëtt vum franséische President Macron gefuerdert. Lokal Institutiounen déi Flüchtlingen ophuelen, solle verstäerkt finanziell gehollef kréien.

© Frederick FLORIN / AFP

Mam Bléck op d'Europawahlen am Mee d'nächst Joer huet de franséische President d'Parlamentarier opgeruff, den direkten Debat mam Bierger ze sichen:

Och d'Europawahle goufe vum Emmanuel Macron ugeschnidden

Genee dësen Debat wier nämlech laang vernoléissegt ginn. Consultativ Debaten iwwert d'EU, mat de Bierger, déi oppen, kritesch an direkt solle sinn, gi vum Emmanuel Macron gefuerdert an huet ënnerstrach, datt hie begréisst datt all d'Memberstaten d'Accord sinn, déi Demarche ze ënnerstëtzen. Jidderee misst bei dësen essentiellen Debatten deel huelen, wëll se eng Konditioun vun der europäescher Demokratie wieren.

De Chef aus dem Élysée muss awer aus den anere Memberlänner mat Widderstand rechnen. Souguer aus Däitschland. Virun allem konservativ Politiker vun der Union gesinn dem Macron seng Iddi vum Euro-Rettungsschierm an d'Aféierung vun engem Euro-Budget kritesch. Och d'Iddi vun engem Euro-Finanzminister bleift ëmstridden.

Déi komplett Ried vum Emmanuel Macron zu Stroossbuerg (17/04/2018)


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.