Slown down EuropeWährend 24 Stonnen - Grouss ugeluechte Vitesskontrollen

An 18 europäesche Länner gouf zanter 6 Auer e Mëttwochmoien an engem sougenannte "Speed-Marathon" d'Vitess op der Strooss kontrolléiert, och zu Lëtzebuerg.

Dat ganzt steet ënnert dem Motto "SLOW DOWN EUROPE".



Et heescht also Fouss vum Gas. De Radar-Marathon huet um Mëttwoch de Moien um 6 Auer ugefaangen an dauert 24 Stonnen bis en Donneschdeg de Moien um 6 also.

Och d'Lëtzebuerger Police schléisst sech mat präventiven a repressive Vitesskontrollen am ganze Land un. Wéi et heescht, wier ze héich Vitess nach ëmmer eng vun den Haaptursaachen vun déidleche Verkéiersaccidenter.



An den éischte 4 Stonne vum Speed-Marathon goufen iwwer 30 Kontrolle gemaach an effektiv och e puer Chauffere gepëtzt, déi ze séier ënnerwee wore, déi zum Deel och e Protokoll kruten. Donieft gouf och deen een oder aneren Automobilist dobäi erwëscht, d'Busspur benotzt ze hunn. An deem Fall hunn d'Leit mat 75 Euro Strof misse rechnen.




2016 goufe während dem Blëtzer-Marathon 199 Verkéierskontrollen duerchgefouert, woubäi 267 Protokoller wéinst ze héijer Vitess hu musse geschriwwe ginn. 

D'lescht Joer waren et der 183 Kontrollen, bei deenen 187 Chaufferen ze séier ënnerwee waren.