FinanzplangEU-Kommissioun fuerdert méi héich Budgetsbäiträg vun EU-Memberstaaten

D'Gesamt-Depensë vun der Unioun sollen tëscht 2021 an 2027 op knapp 1280 Milliarden Euro klammen. Dat gouf e Mëttwoch de Mëtteg zu Bréissel matgedeelt.

© AFP

De Günther Oettinger huet et sech net einfach gemaach. An de leschte Méint huet den EU-Budgetskommissär sämtlech Memberlänner besicht, fir een neien zukünftege Finanzplang kënnen ze fixéieren. Dëse gesäit vir, wéi vill an deenen eenzele Politikberäicher maximal ausginn däerf ginn a wat déi politesch Prioritéite sinn.

Exakt 1279,4 Milliarden Euro soll den neie Budget fir den Zäitraum vun 2021 bis 2027 ëmfaassen, dat sinn 186 Milliarde méi wéi den aktuellen.

Déi politesch Diskussioun driwwer, wéi d’EU-Investitiounen am beschte verdeelt ginn, war jo scho méi laang e Sträitpunkt. Eng besonnesch Erausfuerderung ass de Brexit. Mat Groussbritannien klëmmt jo ee vun de gréissten Nettozueler aus der EU eraus. Doduerch feelen Europa all Joer tëscht 10 an 13 Milliarden Euro, sou den EU-Budgetskommissär Günther Oettinger. D’EU-Kommissioun plangt an Zukunft mat engem Gesamtbudget tëscht 150 an 160 Milliarden Euro pro Joer. Domat géif ee knapp ënnert deem leien, wat den Ament méiglech wier.

EU-Finanzplang / Reportage Frank Elsen

Dem EU-Budgetskommissär no, sinn déi meeschte Länner bereet méi ze bezuelen. Just Holland, Éisträich, Dänemark a Schweden hätten sech géint eng Erhéijung ausgeschwat. Zum Beispill muss Däitschland an Zukunft 12 Milliarden Euro pro Joer méi op Bréissel iwwerweisen, ënnersträicht de Günther Oettinger. Däitschland ass dat gréisste Land a bezilt deemno och am meeschten.

Déi zukünfteg Prioritéite goufen dann och kloer fixéiert. Elleng tëscht 8 an 10 Milliarden Euro sollen an d’Verdeedegung, d’Integratioun an d’Lutte géint den Terror fléissen. An och déi europäesch Grenzagence Frontex soll ausgebaut ginn. Bei den Agrar-a Regionalfërderungen, wou bis ewell am meeschte Suen agefloss sinn, soll maximal ëm 10 Prozent gespuert ginn. Nom Bréisseler Sträit mat Polen ëm Justizreformen an der Demokratie-Kritik an Ungarn sollen dann och Moyene geschafe ginn, fir datt rechtsstaatlech Prinzipie besser agehale ginn.

Fir d’EU-Memberstaate gëtt et also vill ze verhandelen an ze diskutéieren. De Günther Oettinger wëll eng Eenegung fir d’Europawalen am Mee nächst Joer.


                         

 

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.