OochenFranséische President Macron mam Karlspräis ausgezeechent

Fir seng extra Verdéngschter fir Europa, huet e franséische President Emmanuel Macron en Donneschdeg den internationale Karlspräis iwwerreecht kritt.

Virum Hannergrond vun der Eskalatioun am Noen Osten huet de franséische Staatschef Emmanuel Macron en Appel un d'Europäer gemaach, staark a gëeent ze sinn. Loosst eis net schwaach sinn, sot hien an der Mëttesstonn zu Oochen, wou hien de Karlspräis fir seng "Visioun vun engem neien Europa an der Neigrënnung vum europäesche Projet" iwwerreecht krut.

Franséische President Macron mam Karlspräis ausgezeechent (10.05.2018)
Fir seng extra Verdéngschter fir Europa, huet e franséische President Emmanuel Macron en Donneschdeg den internationale Karlspräis iwwerreecht kritt.

De franséische President huet a senger Ried ënnerstrach, datt Europa eng eege Souveränitéit muss opbauen a sech säi Wee net vun enger anerer Muecht dierft virschreiwe loossen. Mam Bléck op d'Reaktioun vu groussen europäesche Länner op d'Erausklamme vun den USA aus dem Atomofkommes mam Iran sot de Macron, et hätt ee sech decidéiert Fridden a Stabilitéit am Noen a Mëttleren Osten ze schafen.

D'Feierlechkeeten hunn en Donneschdeg de Moie mat enger Mass am Doum zu Oochen ugefaang an duerno enger kuerzer Ried vum Buergermeeschter vun Oochen.

D'Laudatio gouf vun der Kanzlerin Angela Merkel gehal. Si huet dem franséische President hir Begeeschterung ausgeschwat, säin Asaz a säi Courage géifen anerer matrappen an huet d'Grënn opgezielt, déi duerleeën, firwat de Macron dëse Präis verdéngt huet.

D'Angela Merkel



Bei de Festivitéite waren e puer Staats- a Regierungsmembere present, ënnert anerem de spuenesche Kinnek Felipe VI, den ukrainesche Staatspresident Poroschenko, déi fréier Laureatin vum Karlspräis a litauesch Presidentin Dalia Grybauskaite a vu Lëtzebuerg de Grand-Duc, de Xavier Bettel, de Jean Asselborn a Jean-Claude Juncker.

De Lëtzebuerger Premier Xavier Bettel an den Ausseminister Jean Asselborn hunn dem Emmanuel Macron bei Twitter felicitéiert.







Protestaktioun vu Greenpeace

Während déi eng dem President Macron säin Asaz fir a seng nei Visioun vunEuropa auszeechnen, protestéieren déi aner virun der Dier géint Zitat d'„obsession nucléaire“ vum franséische President. Greenpeace hat seng Militanten op Oochen geruff, fir sech fir een nuklear-fräit Europa anzesetzen. Op de Banderolen war ënner anerem och ze liesen „Fermez Tihange et Cattenom“. D'Ëmweltorganisatioun fuerdert an engem Communiqué een erneierbart Europa a keen nucleart Europa. Den Emmanuel Macron hätt de Präis nëmme verdéngt, wann hie sech géing dofir asetzen, dass déi geféierlechsten Atomzentralen am Häerz vun Europa géingen zougemaach ginn.

PDF: Schreiwes vu Greenpeace



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.