BréisselEt soll um Atomofkommes mam Iran festgehale ginn

D'EU an den Iran hu sech op déi weider Demarchë gëeenegt, fir och an Zukunft um Atomofkommes festzehalen.

Heiko Maas© AFP

Den iraneschen Ausseminister huet no Spëtzegespréicher en Dënschdeg zu Bréissel mat den Ausseministere vun Däitschland, Frankräich a Groussbritannien, vun engem gudde Start geschwat an sech optimistesch gewisen, dass den Accord, trotz dem Réckzoch vun den USA, ka bestoe bleiwen. Hie géif mengen et wier een um richtege Wee, sou de Mohamed Sarif.

Och d'EU-Diplomatiecheffin Federica Mogherini huet d'Gespréicher als konstruktiv bezeechent. Si huet eng Rei vu méigleche Schrëtt genannt, fir d'Repercussiounen vun den amerikanesche Sanktiounen op déi iranesch Ekonomie ofzefiederen.

Den Iran hat der EU e Sonndeg en Delai vu 60 Deeg gesat Garantien ze ginn, fir um Atomofkommes festzehalen. Dobäi geet et an der Haaptsaach ëm en Ausgläich fir d'Wirtschaftssanktiounen déi d'USA nees géint Teheran agefouert hunn.