Europarot alarméiertRietsextrem an Neofaschisten a Kroatien gewannen ëmmer méi u Stäerkt

Wéi et an engem Rapport vun der Anti-Rassismus-Kommissioun heescht, géifen déi Rietsextrem an Neofaschisten a Kroatien ëmmer méi u Stäerkt gewannen.

Den Europarot ass alarméiert. Dësen Trend géif duerch e Verherrleche vun Ideologien aus dem Zweete Weltkrich verstäerkt ginn, virun allem vum deemolege faschisteschen Ustascha-Regime. D'Experte vum Europarot hale fest, dass verschidde Politiker, mat hetzeresche Rieden, Konflikter tëscht den ënnerschiddlechen Bevëlkerungsgruppen provozéieren. Dat géif net nëmme fir extrem Parteie gëllen, mä virun allem virun de Walen, fir dee ganze politesche Spektrum. D'Haassriede géife sech dacks géint Roma a Flüchtlingen, virun allem Mosleme riichten.

Weider gëtt drop opmierksam gemaach, dass och di serbesch Minoritéit a Kroatien, méi wéi 20 Joer nom Enn vum Balkankrich, nach ëmmer d'Zil vu rassistesch motivéierten Attacken ass. Sou géife serbesch Haiser oder soss Gebaier reegelméisseg mat Nazi- an Ustascha-Symboler beschmiert ginn. D'Auteure vum Rapport hunn d'Regierung zu Zagreb opgefuerdert, konsequent géint Haassriede souwéi Attacken op Minoritéiten virzegoen.