BulgarienZu Sofia ass um Donneschdeg d'Suite vum EU-Sommet

Nodeems d'Staats- a Regierungscheffe fir en informellt Iesse beienee koumen, sëtzen um Donneschdeg och di 6 Länner vum westleche Balkan mat um Dësch.

Et sinn dat Serbien, Montenegro, Albanien, Mazedonien, Bosnien-Herzegowina an de Kosovo. Si wëlle Member vun der Europäescher Unioun ginn. Iwwert d'EU-Perspektive fir dës Länner soll um Donneschdeg awer nach net decidéiert ginn.

Am Mëttelpunkt vum Support den d'EU dëse Länner gëtt, steet den Ausbau vun den Infrastrukturen an der Regioun vum fréiere Jugoslawien. Laangfristeg sollen di 6 Länner Chancen op en EU-Bäitrëtt hunn. Bei de Gespréicher um Donneschdeg ass och nees de Lëtzebuerger Premier Xavier Bettel dobäi. Beim Iessen e Mëttwoch den Owend hat hie sech vu sengem belschen Homolog Charles Michel vertriede gelooss, nodeems hien d'Nouvelle vum Dout vum Camille Gira krut hat.

D’Staats- an Regierungscheffen hu sech iwwerdeems virgeholl zesummenzehalen a sech net vum Donald Trump an den Eck drécken ze loossen. Et géing een, wann den Iran dat och wéilt, weiderhin als EU um Atomaccord festhalen. De Lëtzebuerger Premier Xavier Bettel sot, datt d'USA dann emol ee Geste misste maachen, ier datt ee kéint normal matenee schwätzen. Lëtzebuerg huet wéi ganz Europa een Interêt un uerdentlechen Handelsreaktiounen mat Amerika.


De Xavier Bettel



A puncto Westbalkan ginn déi meescht Staats- an Regierungscheffen optimistesch an d’Diskussiounen eran. Fir den Xavier Bettel ass et awer wichteg, dass een näischt iwwerstierzt. Et wär wichteg am Sënn vum Fridden an der Sécherheet, dass d’Regioun vum Westbalkan stabil ass a sech wirtschaftlech gutt entwéckelt. Dofir bräichten d’Länner Perspektiven, sou nach de Premier.