Serie iwwert den EU-Bäitrëttskandidat Montenegro (4)Op Visitt am gréissten europäesche Wéngert un engem Stéck an Europa

De Montenegro ass e Land mat ville Facetten. Zentral um Westbalkan geleeën an ëmginn vun enger immenser Bierglandschaft.

Op Visitt am gréissten europäesche Wéngert (17.05.2018)
De Montenegro ass e Land mat ville Facetten. Zentral um Westbalkan geleeën an ëmginn vun enger immenser Bierglandschaft.
Den Adriastaat läit also ideal fir d'Wäinproduktioun. An dees gëtt och net ze mann produzéiert. D'Annick Goernes ass bei Plantaze, de gréisste Wënzer am Land, gefuer, fir méi iwwer d'Eegenaart vum montenegrinesche Wäin gewuer ze ginn.

D'Jasna Bozovic ass Responsabel vu Plantaze an zielt vum Wéngert: "70 Prozent vum Wéngert sinn mat eiser heemescher Wäindrauf beplanzt, et ass eng rout Drauf mam Numm Vranac. A mir produzéieren eigentlech all eis rout Wäiner mat Vranac. Den Haaptënnerscheed tëscht all eise roude Wäiner läit an der Produktioun mat verschiddene Mineralien. Donieft hu mir och 3 Joer ale Vranac an eisem Wéngert a 40 Joer ale Vranac. Dës gi gehalen, fir déi beschten TOP-Wäiner ze produzéieren"


Plantaze huet iwwregens de gréisste Wéngert un engem Stéck um europäesche Kontinent mat 2.310 Hektar. Am Ganze ginn 28 verschidde Wäinzorten op der Plaz produzéiert.

D'Jasna Bozovic erkläert d'Produktioun: "Mir produzéieren all Joer 15 Millioune Fläsche Wäin a Brandy. Mir hunn eng grouss Capacitéit, fir verschidde Wäiner ze produzéieren. 65 Prozent vun eisen Drauwe gi fir d'Produktioun vu roudem Wäin benotzt, 25 Prozent fir wäisse Wäin an 10 Prozent fir Brandyen. Mir verkafen de gréissten Deel dovunner am Montenegro, 35 Prozent exportéiere mir a Serbien an de Rescht exportéiere mir a 25 Länner weltwäit, dorënner Länner hei aus der Regioun, an d'EU a ganz bëssen a China, Russland a Kanada."

Uechter de Montenegro ginn et am Ganzen 3.900 Hektar, wou Wäin produzéiert gëtt. Plantaze huet, wéi gesot de Gros dovunner mat 2.300 Hektar a produzéiert 92% vum ganze Wäin am klengen Adriastaat.

Serie iwwer den EU-Bäitrëttskandidat Montenegro (1) - Déi gréisste Westbalkan-Communautéit am Land

Serie iwwer den EU-Bäitrëttskandidat Montenegro (2) - De Montenegro: Tëscht Tourismusboom an Drogemafia

Serie iwwer den EU-Bäitrëttskandidat Montenegro (3) - EU-Bäitrëttsgespréicher mam Montenegro

RTL-News: EU-Sommet: De klengen Adria-Staat Montenegro ënnert der Lupp




Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.