AsylrechtAutomatesch Ëmverdeelung vu Flüchtlingen e Sujet um Ministerconseil

D'Reform vum europäeschen Asylrecht steet um Dënschdeg am Mëttelpunkt vun engem EU-Ministerconseil um Kierchbierg.

Mat um Dësch sëtzt och de Lëtzebuerger Ausseminister Jean Asselborn.

D'Reform stécht zanter 2016 an enger Sakgaass. Di bulgaresch EU-Presidence wëll um Dënschdeg e Kompromëss presentéieren, deen a Krisesituatioune weiderhin eng automatesch Ëmverdeelung vu Flüchtlingen an Europa virgesäit.

Eng ganz Partie osteuropäesch Länner si awer prinzipiell dogéint. Dowéinst musse sech wahrscheinlech d'EU Staats- a Regierungscheffen, Enn Juni op hirem Sommet, mat dësem Thema beschäftegen. D'Minister schwätzen och iwwert d'Situatioun vun de Fluchtweeër Direktioun Europa. An der lescht kommen nees méi Flüchtlingen iwwer Griicheland an Europa.