Europol am WM-Féiwer25 "Most Wanted": Hei de Code fir "de Lëtzebuerger"

Och Europol kuckt, wéi et schéngt, gäre Futtball elo wärend der WM. Anescht ass hir nei Affiche am Kader vun hiren "Most Wanted" an der EU net z'erklären.

Vum David Winter (RTL.lu)

Bei deene 25 Persounen, déi am Moment vun Europol an der EU gesicht ginn, ass iwwregens och eng Persoun aus Lëtzebuerg dobäi. Opfälleg bei der Affiche vun Europol ass deen e wéineg ongewéinlechen Design. Erënneren deet de Site nämlech un d'Panini-Biller, déi et jo ëmmer traditionell fir eng Futtball-WM oder EM gëtt.



Fir dass d'Leit och nach léiwer matmaachen, kritt een no an no déi eenzel Coden, fir d'Biller ze deblockéieren. Virdru gesäit een d'Fotoen nämlech net, sou dass ee sech déi Kriminell zesummesammele kann. De leschte Code gëtt et e Samschdeg 14. Juli, fokusséiere wäert sech d'Aktioun virun allem op déi sozial Netzwierker.

Antëscht ass dann och de Code fir den "Vertrieder" vu Lëtzebuerg publik. En ass: #UWillNeverWalkOut (of jail), also du kënns nimools aus dem Prisong. Anzeginn ass de Code op eumostwanted.eu.



D'Zil vun dëser Aktioun ass et, dass sech d'Leit Gesiichter vun de Leit, déi gesicht ginn, aprägen. Wat méi Leit sech d'Gesiichter verhalen, wat d'Chance méi grouss ass, dass een déi gesichte Persounen och fënnt. D'Doten, déi hinnen zu Laascht geluecht ginn, sinn an der Reegel ganz grave.

Zënter 2016 goufen duerch ënnerschiddlech Aktioune bis ewell 17 geféierlech Krimineller erëmfonnt a konnte festgeholl ginn.

Weider Infoe ginn et hei!







Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.