"The Movement"Bannon-Bekéierung vun Europa?

De fréiere Chef-Strateg vum Donald Trump a Grënner vum rietsextremen Online-Media "Breitbart" ass drop an drun, sech an déi europäesch Politik anzemëschen.

Bannon-Bekéierung an Europa? (05.08.2018)
De Steve Bannon, Ex-Berode vum US-President Trump, wëll an Europa eng nei Beweegung grënne, déi europäesch Rietspopulisten ënnerstëtze soll.
Plangt de Steve Bannon mat enger neier Beweegung "The Movement" eng rietspopulistesch Revolt virun de Walen am Europaparlament am Fréijoer 2019? Dës Fro ass berechtegt. No den Tëschewalen an den USA am November dëst Joer plangt de 64 Joer alen ëmstriddenen Ex-Beroder vum US-President d'Halschent vu senger Zäit an Europa ze verbréngen. Schonn am August gëtt hien a rietsextreme Kreesser mat Begeeschterung erwaart.

Un der EU-Spëtzt weist ee sech den Ament nach wéineg beandrockt. Am EU-Parlament verdeele sech d'Rietspopulisten bis ewell op 3 Fraktiounen mat 151 Memberen. Bis zum Enn vun der Legislaturperiod kéint déi Riets praktesch näischt erreechen. Et misst een awer bedenken, dass nom Succès vun der AfD an Däitschland oder der Lega an Italien sech nach eppes do kann. Och den EU-Austrëtt vu Groussbritannien zwéngt EU-Skeptiker an EU-Géigner sech nei ze sortéieren.