An Zukunft nëmme SummerzäitJuncker annoncéiert: "Zäitëmstellung gëtt ofgeschaaft"

Den EU-Kommissiounspresident Jean-Claude Juncker huet um Freideg de Moien am ZDF-Morgenmagazin annoncéiert, datt d'Zäitëmstellung ofgeschaaft gëtt.

Dat géing um Freideg nach decidéiert ginn, sot de Jean-Claude Juncker. D'Summerzäit géif als eenzeg Zäit zeréckbehale ginn.

Dëst ass d'Suite vun der Ëmfro, déi d'Kommissioun lancéiert hat a bei där erauskoum, datt eng Majoritéit dogéint ass, datt mer zweemol d'Joer un den Zäre dréinen.

En Datum fir d'Ëmsetzung gouf net genannt.

Extrait Jean-Claude Juncker (1)



Extrait Jean-Claude Juncker (2)



Grouss Ëmfro - 80% vu befrote Leit fir d'Ofschafe vun der Zäitëmstellung

D'Zuel schwätzt eng kloer Sprooch. Méi wéi 80% vun den Europäer, déi bei der rezenter Ëmfro vun der EU-Kommissioun matgemaach hunn, hu sech fir d'Ofschafe vun der Zäitëmstellung ausgeschwat.

EU-Zäitëmstellung / Reportage Claude Zeimetz



D'Kommissioun hat Uganks Juli en Online-Sondage iwwert d'Summerzäit bei de Bierger, Intressevertrieder an Entreprisen lancéiert, nodeems d'Europaparlament d'Kommissioun am Februar opgefuerdert hat, Sënn an Onsënn vun der Zäitëmstellung ze préiwen.

4,6 Millioune Leit, dovunner 3 Milliounen Däitscher, hu bis Mëtt August bei der Consultatioun matgemaach. Si sollten uklicken, ob d'Zäitëmstellung bäibehalen oder ofgeschaaft soll ginn an ob d'Leit léiwer déi artificiell Summerzäit oder d'Wanterzäit hale wéilten. Dat Ganzt sollt duerno eenheetlech an alle Memberstaate gereegelt ginn.

Hei am Land hat sech virop de Landwirtschaft- a Konsumenteschutzminister Fernand Etgen zejoert kloer fir en Enn vun der Summerzäit ausgeschwat. Zanter 2002 gi Summer- a Wanterzäit EU-wäit eenheetlech gereegelt. D'Auere ginn dobäi ëmmer de leschte Sonndeg am Mäerz no vir an de leschte Sonndeg am Oktober eng Stonn zréck gestallt. D'Summerzäit war bekanntlech no der Pëtrolskris an de 1970er agefouert ginn, fir Stroum ze spueren. Dat Argument ass awer antëscht awer zimlech ëmstridden.

Riposte géint Trump

De Jean-Claude Juncker huet sech och zu eventuelle Stroftaxen op europäeschen Autoe geäussert.

Sollten d'USA sou eng Mesure ëmsetzen, da géing d'EU mat där selwechter äntweren.

Den US-President Donald Trump hat jo eng Offer vun der EU-Handleskommissärin Malmström fir net gutt genuch befonnt.

De Chef vun der EU-Kommissioun geet dovunner aus, datt d'Taxen op Autoen op d'mannst bis November vum Dësch sinn.

Hien hätt sech mam Donald Trump op eng Wafferou gëeenegt an déi géing agehale ginn, esou de Jean-Claude Juncker um Freideg de Moien um ZDF.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.