EuropaparlamentPolitesch Situatioun an Ungarn um Ordre du jour

Bei der Debatte en Dënschdeg de Mëtteg zu Stroossbuerg ass och den ungaresche Premier Viktor Orban dobäi a stellt sech de Froe vun den Deputéierten.

Eng Uni, déi eventuell muss zoumaachen, an ONGen, déi net méi fräi schaffe kënnen. Budapest suergt mat rezente Mesuren nees fir vill Kritik. D'EU-Parlament dreet mat Konsequenzen. Zu Stroossbuerg kläre se dës Woch d'Fro, ob Grondrechter vun der Unioun net respektéiert goufen, en Dënschdeg de Mëtte geet et lass mat den Debatten. Ungarn riskéiert – no Polen – eng EU-Prozedur op Basis vum Artikel 7.

Ungarn: Reportage Pit Everling



Déi rezent Repressioune bréngen d'Faass zum Iwwerlafen. Europa wëll net méi nokucken a sech wieren, géint den ungaresche Premier Viktor Orban, seng Fidesz-Partei an den autoritäre System, deen um Bord vun der Donau an de leschte Joren opgebaut gouf.

Europäesch Grondwäerter gi mat Féiss getrëppelt, heescht et am Text, iwwer deen en Dënschdeg vu 15 Auer un zu Stroossbuerg debattéiert gëtt, do opgelëscht sinn ënner anerem och Attacken op d'Onofhängegkeet vu Justiz a Press souwéi den Ëmgang mat Migranten.

Den Artikel 7 gëllt an de Verträg als Haaptwaff fir géint Memberlänner virzegoen.

En Dënschdeg gëtt diskutéiert, e Mëttwoch gëtt ofgestëmmt. Gëtt et eng 2/3-Majoritéit, gëtt eng Sanktiounsprozedur lancéiert. De Ball läit da beim Ministerrot. Ma do si wéinst der néideger Unanimitéit d'Chancë kleng, datt et wierklech Suitte wäert ginn. Polen a vläicht nach aner osteuropäesch Länner dierfte sech mat engem Veto dogéint stäipen. Ungarn stellt sech ëmgedréint hannert Polen, géint dat jo och eng Prozedur leeft.

Interessant ass en Dënschdeg besonnesch d'Verhale vun der "Europäescher Vollekspartei", bei där d'Fidesz-Partei Member ass. Den EVP-Fraktiounschef an eventuelle Spëtzekandidat fir d'Europawahlen, Manfred Weber, warnt Budapest jiddefalls, datt et ouni Changementer fir Ungarn ganz schwiereg kéint ginn.

Den éisterräichesche Vizekanzler Heinz-Christian Strache proposéiert dem Viktor Orban iwwerdeems eng gemeinsam EU-Fraktioun. Den ÖVP-Kanzler Sebastian Kuerz, EVP-Member, geet fir säin Deel op Distanz zu Ungarn.

De Viktor Orban wäert iwwregens op eegene Wonsch bei den Debatten am EU-Plenarsall dobäi sinn an eng Ried halen. Hien an aner ungaresch Regierungsmembere schwätze beim EU-Text vun enger Sammlung vu Ligen.

Gemeinsam Fraktioun

Den éisträichesche Vizekanzler Heinz-Christian Strache vun der rietspopulistescher FPÖ huet dem ungaresche Premier d'Kreatioun vun enger gemeinsamer Fraktioun am Europaparlament proposéiert. Hien hätt den Orban an dem seng Fidesz-Partei invitéiert, fir an Zukunft an engem gemeinsamen EU-Block zesummenzeschaffen, sou de Strache op Facebook.

De Chef vun der FPÖ an aner Member vu senger Partei haten an der Vergaangenheet ëmmer nees dem ungaresche Premier seng hefteg Anti-Immigratiouns-Rhetorik ënnerstëtzt. Am EU-Parlament ass d'FPÖ den Ament Member vun der rietspopulistescher Fraktioun "Europa vun den Natiounen a vun der Fräiheet", wärend dem Viktor Orban seng Fidesz Deel vun der EVP-Fraktioun ass.

Den éisträichesche Bundeskanzler Sebastian Kurz vun der rietskonservativer Vollekspartei, deen zesumme mat der FPÖ an enger Koalitioun regéiert, ass iwwerdeems op Distanz zum ungaresche Premier gaangen. D'Deputéiert vun der ÖVP am Europaparlament géife fir eng Prozedur géint Ungarn stëmmen a sech dofir staark maachen, dass d'Fidesz aus der EVP ausgeschloss gëtt.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.