BréisselEU-Parlament lancéiert Strofprozedur géint Ungarn

D’EU-Parlament huet e Mëttwoch an der Mëttesstonn majoritär derfir gestëmmt, dass Ungarn wéinst méigleche verstéiss géint de Rechtsstaat iwwerpréift gëtt.

© FREDERICK FLORIN / AFP
Eng Zwee-Drëttel-Majoritéit war dofir zu Stroossbuerg néideg, an déi gouf et och.

En Dënschdeg war jo schonns eng Debatt, wou och den ungaresche Premier Victor Orban derbäi war. Dobäi huet hie vehement all Reprochë vu sech gewisen an dementéiert, dass säi Land d‘Rechtsstaatlechkeet an d’Demokratie net respektéiere géif.

D’EU-Parlament gesäit dat awer wéi gesot anescht. Sollte Verstéiss festgestallt ginn, riskéiert Ungarn am Rot vun den EU-Staaten eng Stëmm ze verléieren.

Fir de Lëtzebuerger Europadeputéierten Fränk Engel ass d'Decisioun vun haut souwisou längst iwwerfälleg.

De Frank Engel vun der EVP


"Ech halen net vill vum Här Orban", huet de Fränk Engel eis am Interview verstoen ze ginn. Hien géif optrieden wéi de Chef vun enger Sekt, ronderëm déi et hermetesch zou wier an bannent där just säi Wuert a seng Autoritéit géif gëllen. T'géif just drëms goen sech der Globaliséierung ze widdersetzen.

Fir d'EVP misst dat doten noutgedrongen heeschen, dass dës Affär den Ufank vum Enn ass, vun de Relatiounen mat Fidesz, der Partei vum Orban.

D’Regierung ëm de Victor Orban huet an der rezenter Vergaangenheet jo ganz ëmstridde Reformen ëmgesat, notamment wat d’Onofhängegkeet vun der Justiz betrëfft. Kritiker soen d’Meenungs-Fräiheet an d’Gewaltentrennung wiere net méi garantéiert.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.