VIDEO: EU-Sommet zu SalzburgDe Sommet ass eriwwer, awer ouni konkret Resultater

Den EU-Sommet zu Salzburg ass eriwwer, awer ouni konkret Resultater, weder wat de Schutz vun den europäesche Baussegrenzen ugeet.

De Sommet ass eriwwer, awer ouni konkret Resultater (20.09.2018)
Den EU-Sommet zu Salzburg ass eriwwer, awer ouni konkret Resultater, weder wat de Schutz vun den europäesche Baussegrenzen ugeet.

Och nach d'Thema Migratioun oder de Brexit. Déi 28 Staats- an Regierungscheffen hunn zwar keng Léisungen um Dësch, ma zéien awer een éischter positive Bilan. Et wär nämlech vill konstruktiv diskutéiert ginn. D'Annick Goerens mat enger Analys...

EU-Sommet/Reportage Annick Goerens


D'Gebuertsstad vum Mozart huet also awer fir e Minimum un Harmonie gesuergt, wahrscheinlech well et een informelle Sommet war, ob dem zum Schluss keng konkret Léisungen um Dësch leien mussen. Déi britesch Premier Ministesch Theresa May wollt Zougeständnesser vun den EU-Staaten, fir e sougenannte „soften Brexit“ duerchzesetzen. Dogéint hunn sech déi aner 27 awer mat erstaunlech vill Zesummenhalt gewiert, dës Propose géing nämlech den europäesche Bannemaart ënnergruewen.
Den EU-Kommissiounspresident Jean-Claude Juncker resuméiert d'Gespréicher.

Et bleift alles komplizéiert. Mir sinn eis an 90-95 Prozent eigentlech eens, ma et bleiwen awer nach schwiereg Froen: d'Grenz tëscht den 2 Deeler vun Irland, der Provënz an der Republik; d'Fro vun Gibraltar, d'Aart a Weis wéi déi zukünfteg Relatiounen sollen gestalt ginn. Do mëscht d'Kommissioun eng politesch Deklaratioun, déi mir virbereeden an dem Conseil virleeën am Oktober.

D'Theresa May huet doropshin ugekënnegt bis den 18. Oktober och eng nei Propose fir déi problematesch Grenzfro an Nordirland ze liwweren. D'Negociatiounen sollten bis dann eigentlech ofgeschloss sinn. Wann een sech dann nach ëmmer net eens ass, riskéieren béid Parteien een NO-Deal, also keen Accord an den Ament och een harden Brexit.
Den Xavier Bettel

Keen Deal ass net gutt fir Europa, t'ass eng Katastroph fir Groussbritannien.Dofir ass et am Interet vun eis alleguerten, dass mir een Accord fannen, mee net fir egal wéi een Präis.  Si kennen net de Marché kréien, awer mat hire Konditiounen, mat hire Präisser, mat hire Regelen, mat hire Garantien an virun allem och nach mat hirer Gesetzgebung an hirer Kontroll iwwer d'Gesetzgebung. Dat geet net.

A punkto Migratioun wären de Gros vun de Memberstaaten, ma eben net alleguerten, mat der Propose vun der EU-Kommissioun averstane gewiescht, fir d'Agence Frontex opzestocken an d'Baussegrenze besser ze schützen. Länner wéi Ungarn hunn awer Bedenken, well si hir Grenzen selwer schützen wëllen an een Agrëff an hir national Souveränitéit fäerten.
Iwwer d'Verdeelung vun Flüchtlingen gouf guer net vill geschwat, soss wär de Sommet wuel manner harmonesch iwwer d'Bühn gaangen.

An eigentlech war den eenzege klenge Progrès an richtegt Resultat d'Annonce, dass een mat Ägypten eventuell een neie Partner an Nordafrika u senger Säit hätt fir déi illegal Migratioun ze stoppen.
Den éisträicheschen Kanzler Sebastian Kurz

Seit 2016 gibt es jetzt erstmals ein Land in Nordafrika, das bereit zu sein scheint, vertiefte Gespräche zur Migration, zum Kampf gegen Schlepper und anderen Themen aufzunehmen.


Ma och dat ass nach net konkret. an keen wierklecht Resultat. D'Gespréicher mat Ägypten an aneren nordafrikaneschen Länner mussen deelweis mol nach entaméiert an deelweis verdéift ginn. Harmonie also hei zu Salzburg, awer just wann net déi Problemer ugeschwat ginn, wou et soss richteg géing rabbelen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.