EU-Innen- an ImmigratiounsministerBesser Protektioun vun den EU-Baussegrenzen am Fokus

D'EU-Innen- an Immigratiounsminister diskutéieren um Freideg hei zu Lëtzebuerg iwwert eng besser Protektioun vun den EU-Baussegrenzen.

© AFP Archivbild

Lëtzebuerg ass vertrueden duerch den Aussen- an Immigratiounsminister Jean Asselborn.

Déi rezent Pläng fir d'Agence Frontex auszebauen, gëtt virun allem vun deene Länner kritiséiert, an deenen d'Migranten dacks eng éischte Kéier an Europa registréiert ginn. D'EU-Kommissioun huet virgeschloen, déi europäesch Agence fir d'Protektioun vun den EU-Baussegrenze bis 2020 op 10.000 Beamten opzestocken an hir méi Kompetenzen ze ginn. D'EU-Länner un de Baussegrenze fäerten, dass doduerch hir national Souveränitéit kéint beschnidde ginn.

Jee nodeem wéi d'Chamberwalen e Sonndeg ausginn, kéint et dee leschte JAI-Conseil fir de Jean Asselborn sinn. De Lëtzebuerger Aussen- an Immigratiounsminister wollt bei senger Arrivée e Freideg virun allem eppes Prinzipielles lass ginn: De Bols vun Europa géif an dësem Conseil schloen, besonnesch wann et ëm d'Migratioun geet. Zanter 2015 géif dee Bols awer ëmmer méi lues ginn.

De Jean Asselborn - Extrait 1

De Lëtzebuerger Diplomatiechef huet och déi geplangte fräiwëlleg Zesummenaarbecht tëscht de Memberlänner schaarf kritiséiert. D'Laascht just ënnert deenen opdeelen, déi wëllen a kënnen, wäert net funktionéieren, sou en determinéierten Jean Asselborn. Virun allem awer misst endlech iwwert de Kär vum Problem diskutéiert ginn. An dat wier d'Reform vun der Dublin-Prozedur.

De Jean Asselborn - Extrait 2

Frankräich an och Éisträich hu schonn am Virfeld vum Conseil annoncéiert d'Grenzkontrollen ëm e weidert halleft Joer ze verlängeren. Dem Jean Asselborn no, an dat huet den Ausseminister an der Vergaangenheet schonn ëmmer nees gesot, misst een awer sou séier wéi méiglech zréck zum Schengen-Prinzip kommen.

Donieft beroden d'Minister iwwert eng Propos, deemno d'Zuel vun den Expulsioune soll erhéicht ginn. No Donnéeë vu Frontex, ass d'Zuel vun de Migranten, déi an Europa ukommen, däitlech zeréckgaangen. Bis August goufe 86.500 irregulär Arrivéeë registréiert, dat ware ronn 40% manner wéi déi selwecht Zäit zejoert.

Um Bord vum Conseil dierft et och ëm d'Intentioun vu Frankräich an Éisträich goen, d'Grenzkontrolle bannent dem Schengenraum bäizebehalen. Nieft dësen zwee Länner maachen aktuell och Schweden, Dänemark, Däitschland an d'Net-EU Land Norwegen Kontrollen. Déi däitsch Kontrolle lafen den 11. November of a gouf bis ewell net verlängert.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.