Budgetssträit tëscht EU a RoumItalien hält u Budgetsprojet fest, obwuel e vun der EU refuséiert gouf

D'EU Kommissioun hat de Budgetsprojet viru gutt dräi Wochen refuséiert an huet gefuerdert, dass de Budget misst nei iwwerschafft ginn.

Roum weist Bréissel am Scholdesträit déi kal Schëller an hält u sengem Budgetsprojet fest.
Italien refuséiert trotz Protester vun der EU an enger grousser Nervositéit op de Finanzmäert am Budgetssträit nozeginn an de Projet ze iwwerschaffen. D'Budgetsziler fir d'nächst Joer géife sech net änneren, sou de Vizepremierminister Luigi Di Maio en Dënschdeg den Owend. Et wier een iwwerzeegt dovun, dass dëse Budget dat ass wat d'Land brauch, fir nees op d'Been ze kommen. Déi italienesch Regierung wéilt mam Verkaf vu staatlechen Immobilien d'Staatskeess nees opbesseren.

Ob dat d'Kommissioun iwwerzeegt ass a Fro gestallt. Si hat de Budgetsprojet an engem historesch eemolege Schrëtt virun dräi Woche refuséiert a gefuerdert, dass en iwwerschafft gëtt. Eppes wat di italienesch Regierung awer refuséiert. An der Nuecht op e Mëttwoch ass den Delai fir eng Äntwert vu Roum ofgelaf.

D'Finanzmäert reagéieren zanter Wochen nervös op d'Onsécherheet an Italien. D'Land steiert elo op eng Defizitprozedur duer, déi d'Kommissioun scho ganz geschwënn kéint entaméieren. D'EU Partner kënnen dee Moment méi Budgetsdisziplin vun Italien fuerderen. Verstéisst Roum och do dogéint, sinn theoretesch finanziell Sanktioune méiglech.

Fir de Fraktiounschef vun der Europäescher Vollekspartei am Europaparlament, Manfred Weber, ass et awer just eng Fro vun der Zäit, bis d'Regierung zu Roum an der Scholdfro nogëtt. D'Realitéiten an d'Fakte géifen och Roum ganz séier erfaassen. Dat sot hien en Dënschdeg den Owend an den ARD-Tagesthemen. Der populistescher Regierung an Italien géif et d'selwecht goen wéi dem griichesche Premier Alexis Tsipras. Dësen hätt an der Scholdekris och fir d'éischt Bréissel d'Stir gebueden an du schlussendlech noginn.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.