BrexitFall Irland-Nordirland: Eenegung tëscht Groussbritannien an EU

Wéi et vu London heescht, hätt een en Duerchbroch an de Brexit-Gespréicher kéinten erreechen. Detailer sinn nach keng bekannt.

© AFP

Wéi de Büro vun der Premierministesch Theresa May en Dënschdeg den Owend bekannt ginn huet, hätte béid Säiten sech op ee Projet fir de briteschen EU-Austrëtt gëeenegt. Déi britesch Regierung an d'Ambassadeure vun deene 27 aneren EU Länner sollen um Mëttwoch iwwert den Text beroden.

Déi iresch Televisiounschaîne RTE huet gemellt, dass en Accord fonnt gi wier, deen eng fest Grenz tëscht Irland an der britescher Provënz Nordirland géif evitéieren. Eng zukünfteg Grenz war dann och ee vun de Knackpunkten an de Brexit-Verhandlungen. Béid Säite sollen ee Kompromëss fonnt hunn, deen temporär gemeinsam Zollregele vun der EU mat ganz Groussbritannien, souwéi speziell Reegele fir Nordirland virgesäit, soulaang keen definitiven Handelsaccord um Dësch läit.

Déi britesch Regierung kënnt e Mëttwoch de Mëtteg zu London beieneen, fir de Projet ze préiwen an iwwer Schrëtt ze decidéieren. Schonn en Dënschdeg den Owend huet d'Premierministesch Theresa May während Eenzelgespréicher mat hire Minister fir eng Zouso plaidéiert.

Vun der EU heescht et, datt d'Verhandlungen nach net fäerdeg wieren. Groussbritannien wäert d'Unioun jo den 29. Mäerz 2019 verloossen.

Noutfallplang vun der EU
D'EU-Kommissioun huet een Noutfall-Plang decidéiert, fir de Fall, dass d'Brexit-Verhandlungen een Echec ginn. Et geet ëm Beräicher wéi Loftverkéier, Openthalt- a Visa-Froen, Finanz-Servicer oder nach Klimapolitik. Et kéint awer sinn, dass deen Noutfallplang net néideg ass.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.