May wëll hire Plang duerchsetzenLondon am politesche Chaos, DUP fuerdert Récktrëtt vum May

Nodeems et een Duerchbroch gouf, huet den EU-Conseilspresident de Spezialsommet aberuff, iwwerdeems et elo scho 6 Demissioune ginn.

D'Theresa May an de Brexit-Deal (15.11.2018)
Nodeems et een Duerchbroch gouf, huet den EU-Conseilspresident de Spezialsommet aberuff, iwwerdeems et elo scho 6 Demissioune ginn.
Et duerf ee gespaant sinn wéi et zu London weider geet. No engem turbulenten Dag en Donneschdeg mat direkt e puer Récktrëtter, vun zwee Ministeren an zwee Staatssekretären, schéngt de Brexit-Accord op der Kipp ze stoen. D'Premierministesch Theresa May huet den Deal zwar energesch verdeedegt. Et ass allerdéngs net gewosst, wéi si dofir eng Majoritéit am Parlament wëll zesummekréien. Et ass donieft méiglech, dass si sech engem Mësstrauensvott an der eegener Fraktioun muss stellen.
Trotzdeem huet d'Theresa May annoncéiert, dass si um Accord festhält. Si géif weiderhin dru gleewen, dass d'Richtung wéi si se virgeet, déi richteg fir d'Land a säi Vollek ass, sou déi britesch Premierministesch en Donneschdeg den Owend op enger Pressekonferenz.

D'Theresa May



Déi nordiresch Democratic Unionist Party fuerdert iwwerdeems, dass Theresa May soll zeréck trieden. Am anere Fall géif d'Partei géint de Brexit-Accord stëmmen. D'Theresa May ass allerdéngs am Parlament op d'Stëmme vun der DUP ugewisen.

Mat Spannung gëtt iwwerdeems erwaart, wien d'Cheffin aus der Downing Street als Nofolger fir de Brexit-Minister Dominic Raab proposéiert, deen en Donneschdeg aus Protest zeréckgetruede war. D'BBC huet gemellt, dass den aktuellen Ëmweltminister Michael Gove d'Offer zeréck gewisen hätt de Posten ze iwwerhuelen. Hie wollt Changementer am Brexit-Accord, déi Theresa May awer soll refuséiert hunn. De Michael Gove gëllt och als Wackelkandidat fir ee méiglech weidere Récktrëtt.

Aus Siicht vun der EU-Kommissioun hunn d'Demissiounen zu London keng direkt Repercussiounen op den Ofschloss vun de Brexit-Verhandlungen. D'Theresa May wier selwer Verhandlungscheffin vun hirer Regierung, sou eng Spriecherin vun der Kommissioun zu Bréissel.

25. November EU-Spezial-Sommet

De 25. November, deemno e Sonndeg 8-Deeg kommen d'EU Staats- a Regierungscheffe zu Bréissel fir e Brexit-Spezialsommet beieneen. Nodeems et e Mëttwoch een Duerchbroch gouf, huet den EU-Conseilspresident Donald Tusk um Donneschdeg de Moien de Spezialsommet aberuff, fir de Brexit-Accord vun der EU mat Groussbritannien endlech kënnen ofzeschléissen.

Béid Säiten haten Uganks der Woch no annerhallwem Joer laange Verhandlungen e Grondsaz-Accord ausgeschafft. Dëse gesäit e gereegelten Austrëtt fir den 29. Mäerz 2019 vir an eng  knapp zwee Joer laang Iwwergangsphase bis Enn 2020.

No enger fënnef Stonne laanger Debatte e Mëttwoch den Owend krut di britesch Premierministesch den Accord vun hirer Regierung. Domat waren d'Wäiche gestallt fir de Brexit-Spezialsommet.



Reaktioune vun 3 Lëtzebuerger Europadeputéierten
Skeptesch, wat de proposéierte Brexit-Traité ubelaangt, pessimistesch fir den Avenir vun der Theresa May. Dat ass am Resumé d'Meenung vun 3 Lëtzebuerger Europa-Deputéiert iwwer dat, wat den Ament zu London lass ass. Kee vun den 3 Europadeputéierte fënnt de proposéierte Brexit-Text schlecht, mä et gëtt Nuancen. Am meeschte kritesch Distanz bei der Maddy-Delvaux. Och de Liberale Charel Goerens gesäit nach näischt an dréchenen Dicher an de Frank Engel vun der CSV gleeft net esou richteg un de Brexit.

Reaktioune vun Delvaux, Goerens an Engel/Rep. Nico Graf



Récktrëtter

De briteschen Nordirland-Staatssekretär Shailesh Vara ass aus Protest géint d'Brexit-Pläng zeréckgetrueden. Dat huet de Politiker op Twitter bekannt ginn. Den Tory-Politiker huet Groussbritannien als houfreg Natioun bezeechent, déi net sollt dorobber reduzéiert ginn, de Reegele vun anere Länner ze follegen. D'Leit a Groussbritannien hätte Besseres verdéngt, sou de Shailesh Vara. Hie kéint den Accord iwwert den EU-Austrëtt vu Groussbritannien net ënnerstëtzen a géif dowéinst demissionéieren. Dat geplangt Ofkommes géif nämlech opstoe loossen, wéini  Groussbritannien endlech e souveräne Staat géif ginn. Mat dëse Wierder huet de Politiker aus der konservativer Partei vun der Premierministesch Theresa May seng Decisioun justifiéiert.



Kuerz no senger Ukënnegung, koum d'Nouvelle, dass och de Brexit-Minister Dominic Raab zeréck trëtt. Hie kéint den Accord iwwert den Austrëtt vu Groussbritannien aus der EU net mat droen.



Géint 11 Auer huet dunn och d'Aarbechtsministerin Esther McVey hire Récktrëtt annoncéiert. Dat huet d'Tory-Politikerin op Twitter matgedeelt. Dat ass also schonn den 3. Récktrëtt.



Et sollt net dobäi bleiwen... och d'Anne-Marie Trevelyan, d'Suelle Braverman an den Ranil Jayawardena sinn nogezunn an hunn demissionéiert.





Theresa May presentéiert de leschte Stand vum Brexit (14.11.2018)
Deen Deal mat der EU probéiert déi britesch Premierministesch zu London ze verdeedegen. Fir vill Brite geet dat net wäit genuch an ass kee richtege Brexit.

Brexit, oder wéi?



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.