VIDEO - Brexit zu Bréissel"Kompromëss", "kee gudden Dag", "e Feeler"

Um Spezialsommet iwwert de Brexit ass e Sonndeg de Moien den Accord ugeholl ginn. Fir de Kommissiounspresident Juncker ass et trotzdeem kee gudden Dag.

EU seet GB Äddi: Gedréckte Stëmmung zu Bréissel (25.11.2018)
Groussbritannien war 45 Joer laang Member vun der EU. E Sonndeg de Moie gouf eng wichteg Etapp am Brexit-Prozess geholl, awer nach laang net déi lescht.

"Den Accord ass e Kompromëss, et handelt sech net ëm eng Victoire fir Europa an och net fir Groussbritannien." Dat sinn d'Wierder vum Lëtzebuerger Premier Xavier Bettel e Sonndeg op senger Oflschloss-Pressekonferenz op Lëtzebuergesch nom Brexit-Spezial-Sommet zu Bréissel.

Déi 27 verbliwwen EU-Memberstaaten haten den Deal fir den Austrëtt vun de Briten aus der Unioun jo e Sonndeg de Moien ugeholl. De Xavier Bettel bedauert deen Austrëtt, well London och fir Lëtzebuerg ëmmer e wichtege Partner zu Bréissel gewiescht wär.

Dat hei wier dann och kee Begriefnis, mä eng Scheedung, deemno wéilt een och weiderhin en Alliéierte vum Vereente Kinnekräich bleiwen. Ëmmerhin huet Groussbritannien dem Grand-Duché a senger rezenter Geschicht direkt zweemol gehollef, onofhängeg ze bleiwen, esou de Premier.

Deen war och erliichtert, dass mat dësem Accord d'Rechter vun de Milliounen europäesche Bierger am Kinnekräich garantéiert sinn, dorënner eben och d'Rechter vun de ronn 2.000 Lëtzebuerger op der Insel.

D'Theresa May an de Jean-Claude Juncker.


Brexit-Accord séier ugeholl

D'Decisioun iwwert den Accord tëscht der EU a Groussbritannien fir de Brexit war um Sonndeg de Moien um Spezialsommet zu Bréissel séier gefall. D'Staats- a Regierungscheffe vun de 27 Memberen, déi no der Scheedung mat Groussbritannien an der EU bleiwen, haten direkt um Moien den Accord ugeholl, dat huet den EU-Rotspresident Donald Tusk matgedeelt.



Elo muss een nach ofwaarden, wat déi britesch Regierung an d'Parlament maachen, déi och nach iwwert dësen Accord mussen ofstëmmen. Sollt déi Zoustëmmung feelen, kéint den Accord den 29. Mäerz 2019 net a Kraaft trieden.

Zanter e puer Deeg adresséiert sech d'Theresa May verstäerkt direkt un d'Ëffentlechkeet an d'Wirtschaft. Déi britesch Press geet dovunner aus, datt d'Politikerin op des Aart a Weis Drock op d'Parlament maache wëll. . Et ass awer net gewosst, ob d'Theresa May eng Majoritéit fir den Text zesummekritt. Déi nordiresch Partei DUP, op där hir Stëmmen di britesch Premierministesch ugewisen ass, huet domat gedreet den Accord net wëllen ze ënnerstëtzen. Och Deputéiert aus der Theresa May hirer Konservativer Partei wëlle géint d'Ofkommes stëmmen. Den Austrëttsaccord war wärend 17 Méint laangen a schwierege Verhandlungen tëscht Bréissel a London ausgeschafft ginn. E gesäit eng Iwwergangsphase bis Enn 2020 vir an där Groussbritannien am EU-Bannemaart an an der Zollunioun bleift.

Orban kritiséiert Juncker

Nodeems zu Bréissel den Accord ugeholl gi war, huet den ungaresche Ministerpresident Victor Orban dem Jean-Claude Juncker d'Matschold ginn um Austrëtt vu Groussbritannien aus der EU. Et wär e Feeler gewiescht, esou den Orban, de Poste vum Kommissiounspresident enger Persoun ze ginn, déi vun de Briten net akzeptéiert wär. Den zweete Feeler wär et gewiescht, dass d'Unioun Migranten eragelooss hätt, et awer net fäerdeg bruecht hätt, dass d'Briten dobanne bleiwen. Et hätt ëmgedréint misse sinn, esou de rietsnationale Politiker géintiwwer der ungarescher Tëlee.

"Iwwerhaapt kee gudden Dag"

"Et ass kee gudden Dag, iwwerhaapt kee gudden Dag", sot - bei senger Arrivée - de Kommissiounspresident Jean-Claude Juncker. D'Kommissioun hätt eng gutt Aarbecht gemaach, ma wéi vill Leit aus eegener Erfarung wësse géifen, géif et keng glécklech Scheedung ginn.

Extrait Jean-Claude Juncker (lu)



De Jean-Claude Juncker geet dovunner aus, datt dat britescht Parlament um Enn seng Zoustëmmung zum Brexit-Accord gëtt. London géif zoustëmmen, grad wéi d'Europaparlament.

Extrait Jean-Claude Juncker (de)



Keen Deal gutt fir keen

Sou wäit wollt de Lëtzebuerger Premier Xavier Bettel net goen. Hien huet just ënnerstrach, datt keen Deal gutt fir kee wier. Lëtzebuerg géif sech awer bis zum Schluss op all Zeenario preparéieren. Déi zoustänneg Verwaltungen hunn déi lescht Deeg, wéi de Staatsminister sot, den Austrëttsaccord genee studéiert.

Extrait Xavier Bettel Brexit



Lëtzebuerg huet jo e besonnescht A fir d'Finanzplaz. Groussbritannien soll sech duerch de Brexit net kënnen en Avantage verschafen.

Extrait Xavier Bettel Finanzplaz



An Zukunft sollen d'Relatioune via Equivalenze gereegelt ginn, wéi dat elo scho mat den USA oder Japan zum Beispill de Fall ass.



PDF: De Communiqué vum EU-Deputéierte Christophe Hansen (CSV)

De ganzen Interview mam Xavier Bettel



Communiqué mat Reaktioun vum Lëtzebuerger Premier
Xavier Bettel a participé à la réunion du Conseil européen à Bruxelles

Communiqué par: ministère d'État / Ministère d'État

Le Premier ministre, ministre d'État, Xavier Bettel, a participé au Conseil européen extraordinaire, qui a eu lieu le 25 novembre 2018 à Bruxelles.

Le Conseil européen dans son format à 27, s'est réuni sous la présidence de Donald Tusk, pour formaliser l'accord de retrait du Royaume-Uni (Brexit) et approuver la déclaration politique fixant le cadre des relations futures entre l'UE et le Royaume-Uni, qui accompagne l'accord de retrait.

Xavier Bettel a salué l'unité continue dont les 27 Etats membres ont fait preuve au cours des négociations de l'accord de retrait. Il s'est montré soulagé que l'accord de sortie, négocié avec le Royaume-Uni, garantit les droits des millions de citoyens européens au Royaume-Uni, dont les 2.000 Luxembourgeois qui habitent actuellement en Grande Bretagne.

« L'accord de sortie est un compromis, il ne s'agit ni d'une victoire pour l'Europe, ni pour le Royaume-Uni. » a déclaré Xavier Bettel à l'issue du Conseil. Il a déploré que la Grande Bretagne ne soit plus membre de l'Union Européenne mais s'est dit persuadé qu'elle restera un partenaire privilégié de l'Union européenne et donc aussi du Luxembourg. « Avec le départ du Royaume-Uni, le Luxembourg perd un allié à Bruxelles, mais nous garderons des relations étroites avec ce pays qui, au cours du XXe siècle a contribué à deux reprises à ce que le Luxembourg puisse garder son indépendance. »

Spuenien an d'EU an der Gibraltar-Fro eens

Déi britesch Premierministesch Theresa May war schonn um Samschdeg op Bréissel gefuer, een Dag virum historesche Brexit-Sommet.

Hei wollt si am Virfeld vun e Sonndeg den EU-Kommissiounspresident Jean-Claude Juncker souwéi den EU-Rotspresident Donald Tusk begéinen, fir de Sommet ze preparéieren. Op deem soll jo den Accord tëscht Groussbritannien an der EU a Saache Brexit ugeholl ginn.

Allerdéngs hat Spuenien annoncéiert, datt et de Brexit-Accord eventuell net matdréit - wann de Sträit ëm Gibraltar net geléist géif ginn.



Madrid hätt gär, datt an den Accord Schwaarz op Wäiss stoe kënnt, datt et an de Verhandlungen ëm Gibraltar säi Veto kéint aleeën.

E Samschdeg géint 15.15 Auer gouf du gemellt, Spuenien an d'EU wiere sech eens ginn, domat wier de Wee fir de Brexit-Sommet e Sonndeg fräi.

Den Donald Tusk huet e Samschdeg am Nomëtteg offiziell d'Invitatioun fir de Sommet vun de 27 Staats- a Regierungscheffe verschéckt an ugekënnegt, hie géif de 27 recommandéieren, de Brexit-Accord unzehuelen.

Och de Kommissiounspresident Jean-Claude Juncker stoung a permanente Kontakt mam spuenesche Regierungschef.

Spuenien hat domadder gedreet, de Sommet ze blockéieren, sollt et bei spéidere Verhandlungen tëscht der EU a London iwwer Gibraltar net mat um Dësch sëtzen. Dat Recht krut Madrid vun der britescher Regierung elo accordéiert, wéi aus engem Communiqué aus der Downing Street ervirgeet.

Spuenien hätt seng Bedenke fale gelooss, sot dann och de spuenesche Regierungschef e Samschdeg de Mëtteg op enger Pressekonferenz zu Madrid. Dat südeuropäescht Land huet besonnesch gefaart, datt d'Brexit-Ofkommes quasi duerch d'Hannerdier géif festschreiwen, datt Gibraltar zu Groussbritannien gehéiert. EU-Diplomate ginn dovunner aus, datt hannert der haarder Linn vum Pedro Sanchez och innepolitesch Iwwerleeunge matspillen. An der Nopeschregioun vu Gibraltar Andalusien sinn den nächste Weekend Neiwalen.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.