BrexitOfstëmmung zu London ass den 11. Dezember

"Ech hoffen, datt et zu engem Deal kënnt, an hiren an an eisem Interêt" dat sot den Europadeputéierte Charles Goerens iwwert de Brexit.

Hei um EU-Sommet

Vu London ass et e Méindeg den Owend d'Nouvelle, dass dat britescht Parlament den 11. Dezember iwwert de Brexit-Accord ofstëmmt. Dat huet d'Premierministesch Theresa May an enger Ried virun den Deputéierten ugekënnegt.

Eng Majoritéit fir den Accord ass nach laang net sécher.

Virum Vott: Hoffnung an Erliichterung bei den Europadeputéierten Delvaux a Goerens

Fir d'Lëtzebuerger Europadeputéiert Mady Delvaux gëtt et keng gutt Léisung, mä deen hei Accord wier deen eenzegen, dee kéint funktionéieren. Wéi gesinn béid Politiker d'Zukunft vun der EU an déi vu Groussbritannien?

Dem Charel Goerens vun der DP no misst een ervirsträichen, wéi professionell de Michel Barnier geschafft huet. Et wier remarkabel a wéi enger Kohärenz a Kohesioun d'EU sech vun Ufank u beholl huet. Hie kann sech net virstellen, datt d'House of Commons de Courage huet, fir géint den Accord ze stëmmen. De Charel Goerens betount donieft, datt och nom Brexit d'Problemer vun den 27 déi Nämmlecht bleiwen. Et gëtt keng gemeinsam Léisung fir d'Flüchtlingen. D'Reaktiounen op den Macron-Plang fir en neien Integratiounsprozess géifen et nach keng ginn. Vill Fragezeechen.

Brexit/Reportage Claudia Kollwelter



D'LSAP-Politikerin Mady Delvaux schwätzt vun enger Erliichterung. Natierlech kéimen elo déi nächst Hürden. Nach bleift awer ofzewaarden, wat déi britesch Regierung an d'Parlament maachen, déi och nach iwwert dësen Accord mussen ofstëmmen. Et wier awer besser ee schlechten Accord wéi guer keen Accord. Sollt d'Zoustëmmung feelen, kéint den Accord den 29. Mäerz 2019 net a Kraaft trieden.

De Brexit-Deal ass gutt fir d'EU, sou den Donald Trump
En huet domat op en neits Ueleg an d'Feier ëm Debatt ronderëm de Brexit-Accord tëscht der EU a Groussbritannien geschott. Et géif sech no engem extrem gudden Deal fir d'EU unhéieren, sou den Trump e Méindeg zu Washington. Mat Bléck op d'Situatioun vun de Briten sot den US President, dass sou wéi den Deal ausgesäit et gutt kéint sinn, dass Groussbritannien net an der Lag wäert sinn, mat den USA Händel ze maachen. Hie géif och net dovun ausgoen, dass si dat wëllen. Dat wier ee grousse Minus fir den Deal.
Domat huet sech den Donald Trump de facto op d'Säit vun deene gestallt, déi fir en net gereegelte Brexit sinn. Virun allem de rietse Flillek vun hirer Konservativer Partei geheit der Premierministesch Theresa May vir, de Verhandlungspartner zu Bréissel ze vill Konzessioune gemaach ze hunn. Den Accord, den den 11. Dezember nach muss vum britesche Parlament ugeholl ginn, gesäit ënnert anerem Iwwergangsdelaien fir den EU-Bannemaart an d'Zollunioun vir. Dëst géif Groussbritannien effektiv beim Handel mat den USA bis Enn 2020 un d'EU-Reegele bannen, ee britesch-amerikaneschen Handel awer net verhënneren.

 

 

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.