Europäesche GeriichtshaffE juristeschen Exit vum Brexit ass méiglech

Groussbritannien kéint de Brexit awer nach stoppen, an dat souguer ouni Accord vun den anere Memberlänner.

Zu där Konklusioun ass en Dënschdeg de Moie graff formuléiert den Avocat général vum Europäesche Geriichtshaff hei zu Lëtzebuerg komm. Deemno kéint London d'Brexit-Declaratioun eesäiteg zréckzéien.

A senge Konklusiounen hält den Avocat général fest, datt de faméisen Artikel 50 vum EU-Traité engem Memberland d'Méiglechkeet gëtt, seng Austrëttsdeklaratioun virum Ofschloss vun der Prozedur zréckzezéien an domadder also och d'Austrëttsprozedure ze stoppen, dat sot de Manuel Campos Sànchez-Bordona en Dënschdeg de Moien zu Lëtzebuerg.

Viraussetzung ass, datt d'Revocatioun am Aklang mat der Verfassung vum Memberland ass, an de Conseil européen formell iwwert d'Decisioun informéiert gëtt. Dat iewescht schottescht Zivilgeriicht hat den Europäesche Geriichtshaff an dëser Affär ëm eng Appreciatioun gefrot, op Demande vun enger Rei Deputéierten aus dem schottesche, briteschen an dem Europaparlament.

Si wollte wëssen, wéi eng Méiglechkeet si beim Vott iwwert de Brexit-Deal am britesche Parlament iwwerhaapt nach hätten an ob de "Remain" iwwerhaapt nach eng Optioun ass. Juristesch ass en dat wuel also, wann et dem Avis vun en Dënschdeg de Moien nogeet. Do virdrun haten d'EU-Kommissioun an de Conseil nach d'Positioun vertrueden, datt d'Austrëttsprozedure nëmmen duerch eng eestëmmeg Decisioun vum Rot ze stoppe wier.

D'Meenung vum Avocat général vum Europäesche Geriichtshaff ass nach keen Uerteel an och net juristesch contraignant. Gemenkerhand orientéiere sech d'Riichter awer u senger juristescher Appreciatioun. Groussbritannien hat bekanntlech am Mäerz zejoert offiziell seng Intentioun deklaréiert aus der EU auszetrieden an domadder den Artikel 50 declenchéiert.

Ass de Brexit also elo vum Dësch? Sou einfach ass et dann awer och net natierlech, ma d'Konklusiounen vum Avocat général kommen op alle Fall zu engem ganz brisanten Zäitpunkt an dierfte besonnesch de Brexit-Géigner a Groussbritannien neien Driff ginn.

Dat britescht Parlament debattéiert vun en Dënschdeg u wärend 5 Deeg iwwert den ausgehandelten Brexit-Accord
D'Deputéiert stëmmen dann den 11. Dezember driwwer of. Groussbritannien wëll Enn Mäerz 2019 d'EU verloossen. Sollten d'Deputéiert den Accord net unhuelen, oder den Text sou staark änneren, dass een Accord net méi garantéiert ass, dreet een net gereegelte Brexit mat dramatesche Suitten fir all Liewensberäicher.