Europäesche GeriichtshaffExit vu Brexit no EuGH-Uerteel awer méiglech

Groussbritannien kéint decidéieren, awer net aus der EU erauszeklammen, ouni dass déi aner 27 Memberstaaten domat mussen d'accord sinn.

"En Exit vum Brexit ass méiglech." Dat war e Méindeg de Moien de klore Message vun de Riichter vum Europäesche Geriichtshaff um Kierchbierg. Domat sinn d’EU-Riichter dem Avis vum Procureur General nokomm. D’Fro war vum ieweschte schotteschen Zivilgeriicht gestallt ginn, nodeems britesch a schottesch EU-Deputéiert all Optioune wollte gekläert hunn.

Konkret heescht dat, dass Groussbritannien seng Demande op en EU-Austrëtt och erëm kéint zeréckzéien, ouni dass déi aner Memberstaaten domat mussen d'accord sinn, erkläert en Antoine Briand vun der Cour de Justice.

Extrait Antoine Briand

D’Uerteel vum Europäesche Geriichtshaff koum een Dag virum geplangte Vott am britesche Parlament iwwert den Austrëttsaccord. Antëscht huet déi britesch Premierministesch Theresa May awer confirméiert, datt de Vott iwwer d'Brexit-Ofkommes net en Dënschdeg ass, ma reportéiert gëtt.

Eng vun de Konditiounen, déi d'Riichter festgehalen hunn, fir de Brexit nees réckgängeg ze maachen, ass datt dës Mesure mat der britescher Verfassung muss am Aklang sinn. Vun der EU-Kommissioun huet et um Méindeg de Mëtteg direkt geheescht, datt d'EU mat Groussbritannien keng nei Verhandlunge géif entaméieren, fir de Brexit Accord ze renegociéieren. D'Positioun vun der EU hätt sech net geännert, huet eng Spriecherin vun der EU-Kommissioun erkläert.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.