VIDEO: BrexitKeen neien Deal mat Europa, Kritik u May am eegene Land

De Jean-Claude Juncker an och vill europäesch Staatscheffen hunn et der Theresa May kloer gemaach: Et gëtt keen neie Brexit-Deal.

© AFP

Et gëtt kee neien Deal fir de Brexit mat Groussbritannien, sot um Dënschdeg de Moien den EU-Kommissiounspresident Jean-Claude Juncker am Europa-Parlament zu Stroossbuerg.

Méiglech wiere weider Kloerstellungen an Interpretatiounen. Den negociéierten Accord géif awer net nach emol opgemaach ginn.

Aus Angscht virun enger ecrasanter Defaite am britesche Parlament huet d'Theresa May de Vott iwwert den Deal jo a leschter Minutt no hanne verréckelt. Déi britesch Premierministesch ass um Dënschdeg de Moien fir zousätzlech Gespréicher an Holland ukomm, fir mam Premier Mark Rutte ze schwätzen. Duerno geet et op Berlin a weider op Bréissel.

Extrait Jean-Claude Juncker

De Weekend soll um EU-Conseil iwwer de Brexit geschwat ginn, an dat wier en Iwwerraschungsgaascht, well ee sech jo schonn de 25. November mat der britescher Regierung eens gi wier. An awer schéngt et, wéi wann et Problemer op de leschte Meter géif ginn, esou de Lëtzebuerger EU-Kommissiounspresident. Hie géif d'Madamm May en Dënschdeg den Owend gesinn a kann nëmmen ëmmer erëm widderhuelen, deen Deal, dee mir elo hunn, ass de bescht méiglechen Deal, deen ee kann hunn, an deen eenzege méiglechen Deal. Et gëtt als kee Raum, fir nach eng Kéier ze negociéieren, ma et bleift awer Plaz, wann déi intelligent genotzt gëtt, fir weider Präzisiounen an Interpretatiounen ze definéieren.

© AFP (Archiv)


De grousse Problem wier de Backstop fir Irland, esou de Juncker weider. Et wëll een awer alles maachen, datt een dee Backstop ni muss asetzen. Irland gëtt also ni eleng gelooss. De gréisste Problem ass jo déi bannen-iresch Grenz an de sougenannten ausgehandelte Backstop, dee Kontrollen do verhënnere soll, wa Groussbritannien an d'EU keng aner Léisung fannen.

May ënnerwee an Europa, Kritik un hir aus Groussbritannien
De Brexit-Deal läit um Dësch. An Europa wëll kee méi un engem neien Deal schaffen an a Groussbritannien kritt d'Regierung eventuell den Accord vum Ënnerhaus net


Déi britesch Premierministesch war dann um Dënschdeg an Europa ënnerwee, fir mat de Regierungscheffen iwwert den Deal ze schwätzen. An iwwerall krut si déi Äntwert, déi de Kommissiounspresident och schonn am Conseil matgedeelt huet. Et läit een Deal um Dësch an et gëtt keen Neien. An hirem Heemechtsland ass d'Roserei da grouss, datt d'Ofstëmmung verluecht gouf.

"Dat hei ass keng Regierung méi, déi funktionéiert an d'Premierministesch muss zouginn, datt hiren Deal gestuerwen ass. Hir chaotesch Verhandlunge si mat engem Echec ausgaangen a si huet keng Autoritéit méi, fir fir dëst Land Verhandlungen ze féieren. Si huet esouguer keng Autoritéit méi an hirer eegener Partei." huet et am House of Commons vun engem Riedner geheescht.

Bis spéitstens den 21. Januar soll d'Parlament iwwert den Deal ofstëmmen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.