EU-SommetBettel: Europa méi vereenegt wéi dat Vereenegt Kinnekräich

De Staatsminister huet begréisst, datt d'Theresa May hire Mësstrauensvott iwwerstanen huet, anerwäerts wier ee sécher Richtung No-deal gaangen.

D'EU wëll sech am Poker ëm d'Ratifizéierung vum Brexit-Accord a Groussbritannien net erpresse loossen. Den EU-Sommet huet der Premierministesch Theresa May wuel eng Rei vu Konzessioune gemaach, dës sinn awer rechtlech net bindend. Wéi et vun EU-Vertrieder heescht, gëtt d'Onversteesdemech géintiwwer dem Brexit-Chaos a Groussbritannien ëmmer méi grouss. Och hätt Theresa May keng kloer Virstellungen. D'Europäesch Unioun wëll sech dowéinst elo verstäerkt op en Austrëtt ouni Deal preparéieren. Déi britesch Premierministesch hat fir den Optakt vum Sommet en Donneschdeg, rechtlech a politesch Konzessiounen an Engagementer vu Säite vun der EU gefuerdert.

De Premier Xavier Bettel sot en Donneschdeg den Owend am Interview mat RTL Télé Lëtzebuerg, dass een um éischten Dag vum EU-Sommet net richteg weiderkomm ass. Haaptknackpunkt ass och weiderhin de sougenannte Backstop, eng Zort Sécherheetsnetz fir Nordirland. Nom Brexit den 29. Mäerz bleift Irland weiderhi Member vun der EU, Nordirland awer net. Duerch den EU-Austrëtt entsteet domat op der irescher Insel eng Baussegrenz vun der EU. Dem Lëtzebuerger Premier no mussen déi zukünfteg Relatiounen sou séier wéi méiglech gereegelt ginn. Am léifsten hätt een et géif iwwerhaapt net zu engem Backstop kommen, sou nach de Xavier Bettel. Et wier elo u Groussbritannien Decisiounen ze huelen. De Package wier jiddwerfalls zou, wéi de Premier betount, an et géif net nei verhandelt ginn.

Extrait Xavier Bettel (1)



Am Moment ass Europa méi vereenegt wéi dat Vereenegt Kinnekräich, sou nach de Premier Xavier Bettel. Den Ament wier all Zeenario méiglech. Just eppes ass och fir de Xavier Bettel  ausgeschloss, an dat sinn nei Verhandlungen iwwert den ausgehandelten Deal. D'Verhandlungszäit ass elo eriwwer, sot de Premier en Donneschdeg de Mëtteg ganz däitlech. Wéi kënnen d'europäesch Staats- a Regierungscheffen der britescher Premierministesch dann iwwerhaapt nach entgéint kommen?

Fir de Premier Xavier Bettel ass et ausgeschloss, datt een elo nach eng Kéier ufänkt iwwert de Bannemaart an d'Equivalenzen ze diskutéieren. Méiglech wären awer nach weider Diskussiounen iwwert d'Fro "Wat geschitt mat der Irescher Grenz?", sou de Xavier Bettel.
 
Extrait Xavier Bettel (2)

En zweete Brexit-Referendum wier eng souverän Decisioun vu Groussbritannien, huet de Staatsminister nach am RTL-Interview zu Bréissel gemengt. Op der Noriichtenagence AFP gouf de Xavier Bettel en Donneschdeg de Mëtteg mat de Wierder zitéiert, hien hätt léiwer sou en zweete Referendum, wéi en Austrëtt ouni Accord. De Referendum 2016 hätt op Lige baséiert. Do kéint et vläicht eng Léisung sinn, wann d'Briten nach emol ofstëmmen. Sécher ass op alle Fall, datt wann dann een Nee fir de Brexit erauskënnt, dann hätt een déi lescht zwee Joer vill Zäit fir näischt verbraucht, wou een och eppes Besseres hätt kéinte maachen, sou de Lëtzebuerger Premier.

Extrait Xavier Bettel (3)

Um zweeten Dag vum EU-Sommet sollen d'Staats- a Regierungscheffen hiren Accord ginn, fir den Euro-Rettungsschierm ESM ze stäerken. Dësen accordéiert Länner, déi an enger Krisesituatioun sinn, finanziell Ënnerstëtzung. Dat betraffent Land muss allerdéngs Spuerefforten a Reformen entaméieren. An Zukunft soll den ESM méi fréi kënnen intervenéieren, fir eng Finanzkris ze evitéieren. Ëmstridden ass iwwerdeems nach ëmmer d'Aféiere vun engem Budget fir d'Eurozon, sou wéi et Däitschland a Frankräich fuerderen. D'Euro-Finanzminister sollen sech elo bis Mëtt 2019 op eng Positioun eenegen.

SIP / Thierry Monasse, tous droits réservés

De Premier Xavier Bettel huet den innepolitesche Géigner vum Theresa May de Moien zu Bréissel reprochéiert d'Zukunft vun de Relatioune mat der EU op d'Spill ze setzen. De Problem wieren d'Deputéiert zu London, sot de Staatsminister virum Optakt vum zweeten Dag vum leschte Sommet vum Sommet. E puer vun hinne géifen aus innepolitesche Grënn verzichten, d'Bezéiungen tëscht der EU an dem Vereenegte Kinneksräich a Fro ze stellen. An dat wier schlecht. Déi 27 hu gëschter wéi erwaart géintiwwer der britescher Regierungscheffin kloer gemaach, datt den ausgehandelten Deal net nach emol opgemaach gëtt. D'EU preparéiert sech verstäerkt elo op en eventuellen No-Deal. Den éisträichesche Kanzler Sebastian Kurz huet haut net ausgeschloss, d'Staats- an d'Regierungscheffe kéinten nach emol am Januar beienee kommen, sollt de Vott am Parlament zu London en Echec sinn.



D'Theresa May hofft op zousätzlech Garantien um EU-Sommet
Wéi de Rotspresident Donald Tusk a senger Invitatioun schreift, géif een der britescher Regierungscheffin wuel nolauschteren an duerno zu 27 diskutéieren.

Um EU-Sommet war de Brexit d'Thema Nummer 1 (13.12.2018)
Wéi de Rotspresident Donald Tusk a senger Invitatioun schreift, géif een der britescher Regierungscheffin wuel nolauschteren an duerno zu 27 diskutéieren.


Fir d'Theresa May geet et um Donneschdeg nom iwwerstane Mësstrauensvott an hiren eegene Reien drëm, fir bei den europäesche Staats- a Regierungscheffen um leschte Sommet vum Joer zu Bréissel ëm zousätzlech Garantien ze biedelen, an der Hoffnung, datt et de Brexitdeal awer nach duerch d'britescht Parlament packt. De Verhandlungsspillraum ass dobäi extrem enk. De Brexit bréngt et awer op en neits fäerdeg, den eigentlechen Ordre du jour vum Sommet an den Hannergrond ze réckelen.

A senger offizieller Invitatioun schreift de permanente Rotspresident Donald Tusk et géif een der britescher Regierungscheffin wuel nolauschteren an duerno zu 27 diskutéieren. Well d'Zäit ëmmer méi knapp gëtt, soll et dobäi och iwwert d'Preparative fir en eventuellen No-deal-Zeenario also e chaoteschen Austrëtt goen. Vun neie Verhandlunge geet awer am Schreiwes absolut keng Rieds. Déi hat jo schonn en Dënschdeg de Kommissiounspresident Jean-Claude Juncker am Europaparlament kategoresch refuséiert.

Méi Garantien am Brexit-Accord? - Reportage Claude Zeimetz

An och d'Memberlänner si bis ewell net bereet, fir den ausgehandelte Brexitpak nach emol opzemaachen. D'Fro stellt sech souwisou, mat wat d'Hardliner op der Insel iwwerhaapt zefridde stellen ze wieren.

De gréisste Widderstand gëtt et jo wéinst dem Status vun der irescher Grenz an der sougenannter Backstop-Léisung.

Wéi et heescht, soll den Ament am Entworf vun der Ofschlossdeklaratioun just festgehale ginn, datt déi ëmstridde Garantie-Reegel fir déi oppe Grenz wa méiglechst guer net a wann iwwerhaapt fir nëmmen eng ganz kuerz Zäit Realitéit gëtt bis eng besser Léisung fonnt gëtt. Op deen Text esou ugeholl gëtt, ass och nach alles anescht wéi sécher. Déi lescht Versioun soll anscheinend eréischt an der Hënt ficeléiert ginn.

Iwwert dem Owesiessen en Donneschdeg dominéieren dann aussepolitesch Sujete wéi de Sommet mat der Ligue arabe Enn Februar an den Ukrain-Konflikt. En Accord zu 28 iwwer zousätzlech Russland-Sanktiounen dierft et kaum ginn. D'Kompromëssléisung, kéint no der rezenter Eskalatioun tëscht de russesche Gardes-côtes an der ukrainescher Marinn drop erauslafen, datt just mat neie Sanktioune gedreet gëtt. Themen Desinformatioun, Migratioun, Klimawiessel an d'Lutte géint Rassismus a Friemenhaass spezifesch géint Antisemitismus, stinn da muer um offiziellen Agenda. Dat éiwegt Sträitthema Flüchtlingen dierft dobäi nëmme wéineg Plaz kréien. Eng gemeinsam Linn am europäeschen Asylrecht ass nach ëmmer net en Vue, ma et kommen den Ament och wäit manner Migranten um europäesche Kontinent un.

Der Kommissioun hiren neie Plang géint Fake News a Propaganda soll dogéint, besonnesch en Vue vun den Europawalen am Mee, séier Realitéit ginn. Da wëllen d'Staats- a Regierungscheffen awer och eng éischte Kéier iwwert den EU-Budget fir d'Joren 2021 bis 2027 beroden. Och hei ass keng séier Eenegung en Vue. Länner wéi Polen wiere sech géint Aschnëtter bei der Ënnerstëtzung fir strukturschwaach Regiounen. Frankräich zum Beispill ass dogéint, datt d'Moyenen an der Agrarpolitik gekierzt ginn. Den Entworf vun der Deklaratioun vum Sommet gesäit dann och just fir, datt d'Memberstaaten sech bis den Hierscht d'nächst Joer gëeenegt kréien. Donieft soll d'Roll vum Europäesche Rettungsschierm ESM gestäerkt ginn. Bis Mëtt d'nächst Joer sollen d'Euro-Finanzministeren sech dann och iwwert d'Aféierung vun engem gemeinsame Budget fir d'Eurozon eens ginn. Och dat gi keng einfach Verhandlungen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.