EU-KommissiounEuropäesch Unioun huet Noutfallplang fir haarde Brexit ausgeschafft

D'EU-Kommissioun huet e Mëttwoch een Noutfallplang decidéiert fir de Fall vun engem haarde Brexit, also engem EU-Austrëtt vu Groussbritannien ouni Accord.

© Aris OIKONOMOU / AFP

100 Deeg virum geplangten Austrëtt vu Groussbritannien aus der Europäescher Unioun den 29. Mäerz weist sech Bréissel prett fir den Eeschtfall. D'EU-Kommissioun huet an der Mëttesstonn an engem Aktiounsplang 14 Noutfallmesurë fir en No-Deal-Zeenario presentéiert.

E No-Deal beim Brexit - Reportage Claude Zeimetz

Zil ass eng douce Landung a keen abrupt Enn vun de Relatiounen, wéi de  Vizepresident vun der Kommissioun Valdis Dombrovskis virun der Press erkläert huet. Et wëll een, sou wäit et geet, de Schued limitéieren, sollt de geplangte Brexit-Accord effektiv zu London duerchfalen.

An dat besonnesch fir déi Milliounen EU-Bierger a Groussbritannien an d'Briten an der Europäescher Unioun. Well de Chaos, deen e geplatzte Brexit-Deal géif no sech zéie riskéiert si a ville Liewenslagen ze treffen: D'britescht Pond kéint ëm 25 Prozent u Wäert ze verléieren, den Immobiliëmarché kéint den Hick kréien. Fligere riskéieren hir Lizenzen ze verléiere  an d'Formalitéiten op der Grenz zu laange Camionsschlaangen zu Dover féieren.

D'Kommissioun recommandéiert de Memberstaaten an hirer Kommunikatioun vun haut dowéinst eng Zitat "generéis Approche" géintiwwer de concernéierte Bierger. An der Hoffnung, datt London mat den Europäer d'selwecht verfiert. Britesch Staatsbierger déi sech haut legal an engem EU-Memberland ophalen, sollen hire rechtméissege Wunnsëtz och no engem haarde Brexit behalen.  Bei de   legalen Openthaltsgeneemegung gëtt  Pragmatismus vun de Memberstaate gefrot. Dat selwecht gëllt fir hir Krankekeess a Sozialversécherung déi weiderhi koordinéiert solle ginn.

Erkläerten Zil vu Bréissel, "limiter la casse" wéi een op franséisch seet. De Vizepresident vun der Kommissioun Valdis Dombrovskis bleift derbäi, datt et natierlech vu Virdeel wier: "Mir hunn am Package vun e Mëttwoch 14 Mesuren a spezifesche Beräicher definéiert an deenen et bei engem No-Deal géif gréisser Problemer fir eis Bierger an eise Commerce ginn. Dat hei ass en Exercice fir de Schued a Grenzen ze halen"

Zu deene 14 Beräicher gehéieren d'Finanzservicer, d'Aviatioun, Douanestariffer an d'Klimapolitik. Fir e  kompletten Zesummebroch vum Fluchtrafic tëscht dem Vereenegte Kinnekräich an der EU ze verhënneren, sollen an enger definéierter Iwwergangsphas vun 12 Méint dowéinst verschidde Fluchverbindungen oprecht erhal ginn. Donieft proposéiert d'Kommissioun, ëmmer am Fall vun engem No-Deal, datt verschidde Lizenzen am Beräich vun der Fluchsécherheet ëm 9 Méint verlängert ginn. Bei de Finanzservicer wieren  nëmmen eng limitéiert Zuel un Noutfallmesuren néideg fir déi finanziell Stabilitéit ze garantéieren.

Finanzdéngschtleeschter am Beräich vun der Ofwécklung vun Derivater, déi hire Sëtz op der Insel hunn, sollen temporär fir 12 Méint via extra Reegele weiderhi kënnen um europäesche Marché aktiv bleiwen. Dann dreift Bréissel alleguerten d'Memberstaaten hir Douanesservicer op systematesch Kontrollen an nei Bürokratie ze preparéiere fir den Oflaf sou gutt wéi méiglech ze koordinéieren. En decisive Punkt am Aktiounsplang ass dann d'Garantie fir déi kriddeleg Fro vun der Grenz tëscht Irland an dem briteschen Nordirland. D'Kommissioun widderhëlt hiren Engagement fir eng oppe Grenz. Wéi déi am Kader vun engem chaoteschen Austrëtt garantéiert ka ginn, dat geet aus dem Aktiounsplang awer net ervir.

De Plang  muss elo nach duerch d'Europäescht Parlament an de Conseil.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.