No MësstrauensvottBeweegung am Brexit-Dossier

Op der Sich no Léisungen an der Brexit-Fro op der britescher Insel sinn déi Konservativ a Labour hoffnungslos zerstridden.

Beweegung am Brexit-Dossier (17.01.2019)
Op der Sich no Léisungen an der Brexit-Fro op der britescher Insel sinn déi Konservativ a Labour hoffnungslos zerstridden.

325 Deputéierter waren dofir, dass déi britesch Premierministesch, Theresa May, an hirem Amt bleift, 306 Deputéierter waren dogéint. E Mëttwoch den Owend kuerz no 20 Auer eiser Zäit gouf d'Resultat am House of Commons bekannt gemaach.

325 Deputéiert hu géint d'Motioun vun der oppositioneller Labour-Partei gestëmmt, si waren also derfir, datt d'Regierungscheffin weider um Pouvoir bleift.

306 Parlamentarier waren anerer Meenung, si hunn der Fuerderung vum Jeremy Corbyn senger Partei Rechnung gedroen. D'Regierung mat de Ministere bleift also weider am Amt.

D'Theresa May sot Merci, datt hir Regierung d'Vertrauen ausgeschwat krut. Si bleift derbäi, datt Groussbritannien op den 29. Mäerz aus der Europäescher Unioun soll austrieden.

© Ben STANSALL / AFP


Den Oppositiounschef vun der Labour-Partei Jeremy Corbyn hat direkt en Dënschdeg den Owend ee Mësstrauensvotte géint Theresa May ugefrot, iwwert deen dat britescht Parlament um Mëttwoch debattéiert huet.

D'Ministesch hat schonn e Mëttwoch den Owend eng Rei Entrevuen mat den eenzelen Partei-Cheffen. Duerno huet si an enger Ried betount, dass d'Deputéiert zwar elo gewisen hätten, wat si net wéilten, ma elo misst ee konstruktiv zesummeschaffen, fir erauszefannen wat d'Parlament wéilt. 

Theresa May: "Dat ass firwat ech d'Deputéiert vun all Partei invitéieren fir zesummen ze kommen fir e Wee no vir ze fannen. E Wee den de Referendum respektéiert an den d'Parlament och ënnerstëtzt. Et ass elo Zäit fir Eegen-Interessi op d'Säit ze setzen. Ech sinn enttäuscht, dass de Leader vun der Labour-Partei sech bis elo net gemellt huet fir un Gespréicher Deel ze huelen, mee eis Dier bleift op.

Et ass keng einfach Aufgab, mee d'Deputéiert wëssen, dass si d'Flicht hunn am nationalen Interessi ze handelen, een Konsens ze fannen an dëst endlech iwwer d'Bühn ze bréngen.

An engem historeschen Vott 2016, huet d'Land decidéiert d'EU ze verloossen. 2017 hunn 80 Prozent vun de Leit decidéiert Parteien ze wielen, déi an hirem Manifester stoen haten, dass si dëst Resultat géingen respektéieren. Elo zwee an een halleft Joer méi spéit, ass et Zäit fir zesummen ze kommen, d'nationaalt Interessi an de Virdergrond ze setzen an endlech d'Resultat vum Referendum ëmzesetzen."

D'Theresa May huet sech enttäuscht gewisen, dass de Labour-Chef Jeremy Corbyn refuséiert huet, si fir Gespréicher ze gesinn, dat esoulaang wéi si een net-gereegelte Brexit net ausschléisst. Si géif dat bedaueren, mä hir Dier géif weiderhin opstoen, sou di britesch Premierministesch.

E Méindeg wëll si dem Parlament ee Plang presentéieren, wéi et soll weidergoen, fir ee chaoteschen Austrëtt an 10 Wochen awer nach ze verhënneren. D'Optioune fir Neiwalen oder een zweete Referendum sinn nom Vott vun e Mëttwoch den Owend, nees virleefeg vum Dësch.

E puer Zeenarioen sinn elo méiglech. D'Theresa May ka probéiere weider Konzessioune vu Bréissel ze kréien an d'Parlament dann nach eemol iwwert den Accord ofstëmme loossen. Et ass awer och méiglech, dass den Austrëttsdatum op méi spéit verluecht gëtt oder et kënnt den 29. Mäerz zu engem haarde Brexit.

Iwwer 70 Deputéiert vun der Labour-Partei hunn e Mëttwoch ee Bréif ënnerschriwwen, an dem si ee weidere Referendum fuerdere mat der Optioun, d'Brexit-Decisioun vum Referendum 2016 réckgängeg ze maachen. Och di schottesch Premierministesch Nicola Sturgon ass der Meenung, dass en zweete Referendum déi eenzeg credibel Optioun ass. Och di proeuropäesch Liberaldemokraten am britesche Parlament sinn dofir.

D'EU huet Groussbritannien iwwerdeems ugekënnegt, dass si bereet wären ze negociéieren. Wann d'Vereente Kinnekräich an Zukunft Ännerungen u senge roude Linnen zouléisst, da wär d'EU direkt bereet mat enger positiver Äntwert“. Dat sot den EU-Chef-Negociateur Michel Barnier e Mëttwoch virum EU-Parlament zu Stroossbuerg. Just op engem zentralen Punkt géing d'EU net bougéieren. Et misst verhënnert ginn, dass nees eng physesch Grenz tëscht Irland an Nordirland entsteet.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.