Brexit Plang BMay wëll Grenzfro mat Nordirland verhandelen, EU schléisst Noverhandlungen aus

D'Theresa May huet annoncéiert, nach emol mat der EU iwwert d'Grenzfro tëscht dem EU-Member Irland an der britescher Provënz Nordirland ze verhandelen.

Wei geet et mam Brexit virun? (21.01.2019)
E Méindeg sollt si dem Parlament e Plang B virleeën, mä wirklech eppes Neies war net dran.
Déi britesch Premier Ministesch Theresa May kämpft weider fir en Deal mat der EU.

Theresa May - Extrait No Deal

“Fir en No Deal ze verhënneren, muss dëst Haus engem Deal mat der EU zoustëmmen. Dat ass wat dës Regierung probéiert z’erreechen.”

Knackpunkt vum Accord, dee lescht Woch vum Parlament verworf gouf, ass dee sougenannte Backstop. D’Premierministesch huet dozou e Méindeg den Owend gesot, dass si d'Grenzfro tëscht dem EU-Member Irland an der britescher Provënz Nordirland nach eng Kéier wëll mat der EU diskutéieren. Am Accord war bis ewell virgesinn, datt Groussbritannien an der Zollunioun mat der EU bleift, wa keen aneren Accord fonnt gëtt.

Theresa May - Extrait Backstop

“Ech wäert dës Woch weider mat Kollege schwätzen, och vun der DUP, fir ze kucken wéi mir eis Obligatiounen vis-a-vis vun de Mënschen an Irland an Nordirland kënnen erfëllen a gläichzäiteg méiglechst vill Zoustëmmung vum Parlament kënne kréien. D’Conclusioune vun deene Diskussioune wäert ech dann mat zeréck bei d’EU huelen.” 

En zweete Referendum huet d’Theresa May op en Neits kategoresch ausgeschloss. Dofir géif et hirer Meenung no keng Majoritéit am Parlament. Ma och fir e Brexit ouni Accord géif et keng Majoritéit.

Et misst een d’Resultat vum éischte Referendum respektéieren a méiglechst séier en Accord mat der EU fannen, mat deem d’Parlament averstanen ass.

U konkrete Mesuren huet d’Premier Ministesch ugekënnegt, dass EU-Bierger, déi och nom Brexit wëllen a Groussbritannien bleiwen dofir keng 65 Pond musse bezuelen, wéi ursprünglech geplangt. De sougenannten “Settled status” gëtt EU-Bierger weider Accès zum Gesondheets- a Schoulsystem.

Den Deal, deen d’Premier Ministesch mat der EU ausgeschafft hat, ass lescht Woch mat 230 Stëmmen refuséiert ginn.

D'EU wëll allerdéngs net no-verhandelen

D'EU wëll allerdéngs net no-verhandelen. E Porte-Parole vum Conseilspresident Tusk sot e Méindeg den Owend, dass een ëmmer bereet ass, sech ze gesinn a mateneen ze schwätzen.

Et hätt een awer schonn am Dezember kloergestallt, dass deen ausgehandelte Brexit-Accord net nei verhandelt kéint ginn.

An de leschten Deeg huet d’Theresa May eng ganz Partie Deputéiert gesinn, fir iwwert e Plang B ze diskutéieren. Ma d’Oppositioun reprochéiert der Premierministesch, dass si net wierklech nogelauschtert hätt an dës Gespréicher nëmmen Aewëscherei gewiescht wieren.

U konkrete Mesuren huet d’Premier Ministesch ugekënnegt, dass EU-Bierger, déi och nom Brexit wëllen a Groussbritannien bleiwen, dofir keng 65 Pond musse bezuelen, wéi ursprénglech geplangt. De sougenannte “Settled status” gëtt EU-Bierger weider Accès zum Gesondheets- a Schoulsystem.

Den Deal, deen d’Premier Ministesch mat der EU ausgeschafft hat, ass lescht Woch mat 230 Stëmmen refuséiert ginn.

D'EU Kommissioun wëll sech um Dënschdeg offiziell äusseren.

Initiativ "RemainerNow" an APP fir EU-Bierger
Déi britesch Premierministesch muss sech iwwerdeems op dat nächst Iwwel astellen. Eng Partie Deputéiert am House of Commons wëllen der Theresa May deelweis d'Kontroll iwwert de Brexit-Prozess ewech huelen. Dat melle britesch Medien. Sou soll eng parteiiwwergräifend Initiative d'Premierministesch dozou bréngen, d'Austrëttsprozedur ze stoppen, sollt bis Enn Februar keen Accord am britesche Parlament fonnt gi sinn. Eng Spriecherin vun der Regierung huet des Initiative extrem beonrouegend genannt.

Artikel: Huelen déi britesch Deputéiert elo d'Saach an d'Hand?

Donieft hu wéinst dem Chaos deen dreet, eng sëlleche Bierger, déi Uganks fir de Brexit waren, d'Lager gewiesselt. Si wéilten am Léifsten de Referendum vum Juni 2016 duerch een zweete Referendum revidéieren. Si hu sech an der Initiative mam Numm "RemainerNow", wat sou vill heescht wéi d'Elo Brexit-Géigner, zesummegedoen.





Déi britesch Regierung lancéiert iwwerdeems um Méindeg eng nei Smartphone-App fir EU-Bierger, déi no engem Brexit a Groussbritannien wëlle bleiwen. Ronn 3,5 Milliounen EU-Bierger, déi den Ament a Groussbritannien liewen, mussen nom Brexit eng nei Demande maachen, fir weider kënnen am Land ze schaffen a staatlech Hëllefen ze kréien.

Ausseminister zu Bréissel

Virum Hannergrond vun där onklorer Situatioun a Saache Brexit, kommen d'EU Ausseminister e Méindeg zu Bréissel beieneen.  De Brexit steet wuel net offiziell op der Agenda, mä dierft awer um Bord vun de Berodungen intensiv diskutéiert ginn. Lëtzebuerg ass vertrueden duerch den Ausseminister Jean Asselborn.

Offiziell beschäftege sech d'Ministere mat der Situatioun no den ëmstriddene Walen an der Demokratescher Republik Kongo an dem Konflikt am Venezuela. Ee weidere Sujet ass virun den Europawalen am Mee d'Protektioun viru falschen Informatiounen an der Influenz duerch Drëttstaate wéi Russland. Donieft preparéieren d'EU Ausseminister de Sommet vun der Europäescher Unioun mat der Arabescher Liga am Fréijoer an Egypten.

Um Bord vum Conseil zu Bréissel sollen och Sanktioune géint véier Russen, 4 Syrier an eng Organisatioun wéinst dem Asaz an der Entwécklung vu chemesche Waffen decidéiert ginn. Dozou gehéieren och zwee presuméiert russesch Geheimagenten, déi am Mäerz zejoert de fréieren Duebelagent Sergej Skripal a Groussbritannien solle vergëft hunn.

Eng weider Reform vun der Währungsunioun steet e Méindeg am Mëttelpunkt vun den Diskussioune vun de Finanzminister vun der Eurozon. Et geet ënnert anerem ëm d'Ëmsetze vun den Decisiounen, déi um EU Sommet am Dezember getraff goufen, wat d'Stäerke vum Euro-Rettungsfong ESM an engem Budget fir d'Eurozon betrëfft. Och d'Situatioun an Italien dierft zur Sprooch kommen, nodeems am Sträit tëscht der EU Kommissioun an der Regierung zu Roum, iwwert d'Héicht vum italienesche Staatsbudget, eng Léisung fonnt gi war. Verschidde Memberlänner reprochéiere Bréissel ze séier noginn ze hunn.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.