Keen "No-Deal"Britescht Parlament wëll Backstop nei verhandelen, EU refuséiert dat

Gouf eng ähnlech Propos vun de Schotten ofgeleent, konnt d'Caroline Spelman eng knapp Majoritéit hannert sech kréien, dat géint en "No-Deal-Brexit".

© parliamentlive.tv
Virun der Ofstëmmung gouf vill diskutéiert. D'Brexit-Hardliner, déi schonn d'Theresa May wollte stierzen, wëllen dobäi der Europäescher Unioun d'Schold ginn. Et géif villes drop hindeiten, datt si d'Ufro vum Brady wëllen ënnerstëtzten an der Premierministesch en neien Optrag wéilte ginn, fir en neien Deal ze verhandelen. Falls d'EU dann awer net géif alenken, wier si dru Schold, wann et den 29. Mäerz zu engem Chaos-Brexit géif kommen.

Bréissel dogéint hat schonn am Virfeld annoncéiert, dat ee keng weider Zougeständnesser wéilt maachen, eng Alternativ zum aktuellen Deal huet d'EU ofgeleent. Fir d'Liberal-Demokraten am britesche Parlament wier dofir en zweete Referendum eng besser Alternativ, wéi en No-Deal mat der EU.

© parliamentlive.tv


Brexit gëtt net definitiv no hanne verluecht

Als éischt gouf iwwer d'Propos vum Jeremy Corbyn, de Chef vun der Oppositioun, ofgestëmmt, datt de Brexit no hanne verluecht gëtt, fir ebe méi Zäit ze hunn, fir e gereegelte Brexit virzebereeden an eventuell eng Zollunioun mat der EU anzegoen.. Dëst gouf awer wéi erwaart mat enger knapper Majoritéit ofgeleent. 296 Membere vum Parlament hunn dofir gestëmmt, 327 awer dogéint.

Schottland dierf net an der EU bleiwen

De Virschlag vun der Schottescher Nationalpartei, en haarde Brexit ouni Deal auszeschléissen an en zweet Referendum z'organiséieren, gouf och ofgeleent. Hei hu just 39 Membere vum Parlament dofir gestëmmt. Donieft haten d'Schotten och proposéiert, datt si an der EU kéinte bléiwen. Dëst gouf awer och net ugeholl.

Parlament kritt net Kontroll iwwer Brexitverhandlungen

D'Propos vum Dominic Grieve gouf just ganz knapp ofgeleent, mat 301 géint 321 Stëmmen. Hien hat virgesinn, op dat d'Parlament fir e puer Sëtzunge géif d'Kontroll vum Brexit-Deal kréien, fir eben un dësem ze schaffen a virzebereeden an domadder d'Regierung ronderëm d'Theresa May dës Kontroll ewechzehuelen.

Frist net automatesch verlängert bei No-Deal

De Virschlag vun der Deputéiert Yvette Cooper huet virgesinn, datt d'Frist misst verlängert ginn, sollt Enn Februar keen Deal stoen. Domadder hätt si d'Theresa May ënner Drock gesat. Ma och dëse gouf mat 298 op 321 ofgeleent. Dobäi bleift den Datum vum 29. Mäerz weider bestoen.

Frist net op 2 Joer verlängeren

Och d'Propos vum Rachel Reeves, fir de Brexit-Datum op 2 Joer no hannen ze verleeën, gouf net ugeholl, dat mat 322 Stëmmen zu 290.

Groussbritannien wëll keen "No-Deal"

D'Propos vum Caroline Spelman dogéint gouf awer ugeholl. Dat mat 318 zu 310 Stëmmen. Domadder ass et kloer, datt Groussbritannien en "No-Deal-Brexit" ofleent. Sollt awer bis zum 29. Mäerz keen Deal stoen an d'Frist, fir aus der EU auszetrieden, net verlängert ginn, kann et nach ëmmer zum chaotesche Brexit kommen. D'Majoritéit vum Ënnerhaus huet awer mat dëser Ofstëmmung den Drock op d'Theresa May vergréissert, well een d'Premierministesch heimatter opfuerdert, en Deal mat der EU ze fannen, deen och dat britescht Parlament unhëlt.

May kritt Optrag, fir Backstop nei ze verhandelen

Dono ass et nach ëm d'Propos vum Graham Brady gaangen, déi de Backstop nach eng Kéier verhandelt wëll gesinn, respektiv esouguer komplett geännert soll ginn. Hei huet d'EU awer confirméiert, datt een de Backstop net méi verhandelt soll ginn. De Backstop gesäit nämlech vir, datt de Brexit net komplett antrëtt, esoulaang keng Léisung tëscht Irland an Nordirland fonnt gouf. De Backstop géif domadder och verhënneren, datt et op der Insel zu Grenzkontrolle géif kommen. Dësen Amendement gouf dann och ugeholl, datt mat 317 zu 301 Stëmmen.

Esou huet d'Parlament um Dënschdeg der Theresa May en neien Optrag ginn, fir sech eben nach eng Kéier mat der EU un den Dësch ze setzen an eng Léisung fir de Problem op der irescher Insel ze fannen.

EU leent britesch Fuerderung of

Scho kuerz nodeem dës Decisioune zu London gefall sinn, huet e Spriecher vum EU-Rotspresident Donald Tusk et kloer gemaach, datt d'EU nach ëmmer déi Ännerungen, déi d'britescht Ënnerhaus fuerdert, ofleent. Et wëll een um aktuelle Vertrag, deen dee beschten an eenzege Wee wier, festhalen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.