VIDEO: Brexit-Gespréicher zu Bréissel"Robust, awer konstruktiv" Gespréicher tëscht May a Juncker

E Brexit ouni Ofkommes, e sougenannten No-Deal wier eng Katastroph fir jiddereen, dat war de Message un d’Premierministesch, déi op Visitt zu Bréissel war.

"Robust, awer konstruktiv" Gespréicher tëscht May a Juncker (07.02.2019)
E Brexit ouni Ofkommes, e sougenannten No-Deal, wier eng Katastroph fir jiddereen, dat war de Message un d’Premierministesch, déi op Visitt zu Bréissel war.

Et bleiwen nach genee 50 Deeg bis zum Brexit an d’Theresa May huet net wëlles, de Stéchdatum réckelen ze loossen. "Robust, awer konstruktiv" wieren d'Gespréicher gewiescht en Donneschdeg zu Bréissel tëscht der Theresa May an dem Jean-Claude Juncker, wat wuel souvill heescht, wéi dass et haart hiergaangen ass, mä een no baussen hi weider Optimismus verbreede muss.

Et bleift awer dobäi: Bréissel wëll den Austrëttspabeier net nei verhandelen, déi britesch Premierministesch brauch awer wéinstens kleng Zougeständnesser, fir hiert Parlament ze iwwerzeegen.

D'Zäit gëtt ëmmer méi knapp. No hire Gespréicher zu Bréissel schwätzt d' Theresa May um Freideg mam iresche Premier Leo Varadkar iwwer méiglech Changementer am Brexit-Accord mat der EU. Dofir reest Theresa May op Dublin.

Den iresche Premier hat e Mëttwoch während enger Visite zu Bréissel an enger gemeinsamer Deklaratioun mam Jean-Claude Juncker betount, dass de Brexit-Accord, wéi en elo um Dësch läit, dee beschten an eenzeg méiglechen Deal ass. Hien huet zousätzlech Verhandlungen ausgeschloss. Dat britescht Parlament hat den Accord Mëtt Januar allerdéngs kloer refuséiert. Haaptkritikpunkt vun de Brexit-Hardliner ass de sougenannte Backstop fir déi britesch Provënz Nordirland, dee Kontrollen un der Grenz mam EU-Memberland Irland soll verhënneren. A knapp 8 Woche soll Groussbritannien aus der EU austrieden.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.