Fir den 168.Besonnesche Gebuertsdagsbouquet fir "Hauptmann von Köpenick"

Schüler aus dem LGL begéinen engem "falschen" Hauptmann um Graf vum "echte" Wilhelm Voigt ...

© Marc Jeck
Am Kader vun engem pädagogesche Projet beschäftege sech Schüler vun enger 4e aus dem Lycée des Garçons (LGL) mam "Hauptmann von Köpenick", dee jo seng lescht Joren zu Lëtzebuerg verbruecht huet a säit 95 Joer um Nikloskierfecht um Lampertsbierg begruewe läit. Déi reell an déi fiktiv Figur vum Wilhelm Voigt, ma och de Mythos an d'Receptiounsgeschicht ronderëm den "deutschen Eulenspiegel des 20. Jahrhunderts", wéi de Carl Zuckmayer den "Hauptmann von Köpenick" an engem Bréif un dee deemoleg Buergermeeschtesch Colette Flesch bezeechent huet, stinn am Mëttelpunkt vun enger Dokumentatioun a Recherche, déi d'Schüler zesumme mat hirem Däitschproff Sylvie Fautsch op de Spure vum Initiator vun der "Köpenickiade" wandele léisst.

Und ewig lockt der Hauptmann ...© Marc Jeck

Fir de Schüler d'Figur vum "Hauptmann" méi nozebréngen, ass um Méindeg, 13. Februar extra den däitsche Schauspiller Jürgen Hilbrecht vu Berlin ugereest - an der Hauptmannsuniform a mat engem Bouquet Blummen, fir um Graf vum Wilhlem Voigt néierzeleeën.

"Un Capitaine de Coepenick peut en cacher un autre"!© Marc Jeck


"Köpenick gratuliert Dir, lieber Wilhelm Voigt zu Deinem 168. Geburtstag", steet um Blummebouquet, well um 13. Februar hat de Gauner, deen dat preisescht Militär "ad absurdum" gefouert hat, Gebuertsdag. Den "Hauptmann von Köpenick" ass nämlech den 13. Februar 1849 - an net 1850, wéi et um Grafsteen fälschlecherweis steet - zu Tilsit gebuer an ass den 3. Januar 1922 zu Lëtzebuerg gestuerwen.

Déi Blummenaktioun erënnert drun, wéi de Schauspiller Joseph Offenbach, deen 1956 an der Verfilmung vum Zuckmayer sengem "Hauptmann von Köpenick" d'Haaptroll gespillt huet, am Oktober 1969 Blummen op d'Graf vum Wilhelm Voigt leet oder wéi de Lëtzebuerger Sänger Chris Baldo e puer Méint méi spéit deen ale Grafsteen botzt a mat Blummen dekoréiert.

© Marc Jeck


De Jürgen Hilbrecht, dee säit e puer Joerzéngten a senger Paraderoll vum "Hauptmann" regelméisseg zu Berlin optrëtt, huet de Schüler de Wilhelm Voigt aus der Vue vun engem "Berliner Original" erzielt.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.