Ënner 44 KandidatenD'Suzanne Cotter gëtt nei Direktesch vum Mudam

Dat huet de Laurent Loschetter um Freideg de Moien am Kader vun enger Pressekonferenz confirméiert. Si wäert den 1. Januar 2018 hir nei Plaz anhuelen.

Suzanne Cotter nei Direktesch am Mudam / Rep. C. Kollwelter



D'australesch Konschthistorikerin a Curateurin ass zanter 2013 Direktesch vum "Museu de Arte Contemporânea de Serralves" zu Porto. Si iwwerhëlt d'Successioun vum Enrico Lunghi, deen Enn 2016 demissionéiert hat.

44 Kandidature waren erakomm, dorënner 3 vu Lëtzebuerg.

Fir de Mudam war d'Suzanne Cotter vun Ufank un op Plaz 1, wat de Choix ugaangen ass, well si en enorme Carnet d'adresses huet a vill Wäert op d'Aarbecht an der Ekipp leet.

De Kontrakt mat der Australierin ass am August ënnerschriwwe ginn, den 1. Januar 2018 iwwerhëlt Si dann den neie Posten.

Hire Posten zu Porto gëtt se of, wäert allerdéngs an enger Transitiounsphas nach am Januar a Februar am Musée hir Projete fäerdeg maachen, während d'Haus a Portugal no engem Successeur sicht.

An de leschten 9 Méint, an deenen de Mudam ouni Direktesch Posten war, huet sech awer sou munches gedoen, betount de Laurent Loschetter. De ganzen Espace accueil ass geännert ginn an am Mudam ass elo fräien Entrée bis bei de Café. D'Leit kënnen deemno elo do iessen oder eppes drénken, ouni mussen ze bezuelen, a kréien dobäi och schonn e klengen Androck vun der Expo am Mudam. D'Iddi dohannert ass, dass d'Visiteuren doduerch solle Loscht op d'Expoen am Mudam kréien. D'Suzanne Cotter war bei dëse Verännerungen och scho mat agebonnen, esou de Laurent Loschetter.  

Extrait Laurent Loschetter



All dëst hätt d'Ekipp immens zesumme geschweesst an d'Haus wier prett fir datt déi nei Direktesch komme kann an och direkt an hirer Funktioun als kulturelle Programmateur ka schaffen, sou nach de Laurent Loschetter.

Ma bis dohin ass de Programm vum Musée och scho gutt gefëllt. Mam Optakt vun direkt 2 neien Expoen, dorënner dem Su-Mei Tse säin "Nested", fir déi si ënnerschiddlech Medie wéi Skulptur, Video, Fotografie an Installatioune gewielt huet a Froe vun Zäit, Erënnerung, Musek oder och Sprooch nogeet. D'Expo ass nach bis Abrëll am Mudam ze gesinn.



Déi zwou nei Expoen am Mudam:

SU-MEI TSE . NESTED
07.10.2017 - 08.04.2018

FLATLAND ABSTRACTIONS NARRATIVES #2
07.10.2017 - 15.04.2018

Nei Expoen am Mudam (06.10.2017)
Onkommentéiert Biller.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.