VIDEO: E Stéck vun der BréckNei Produiten aus der Baatsch vum Pont Adolphe

Wéi kann een aus enger aler grousser Plastiksbaatsch eppes ganz Neies maachen? Kreativ Käpp hu sech dës Fro gestallt an de Projet "Dono" ass entstanen.

Nei Produiten aus der Baatsch vum Pont Adolphe (23.11.2017)
4 Joer laang war d’Bréck hannert der grousser Baatsch verstoppt. Elo sinn aus hir nei Produiten entstanen.
Hei geet et konkret ëm déi 10.000 Quadratmeter grouss Baatsch, déi fir d'Zäit vum Chantier ronderëm d'Pont Adolphe war. Elo sinn aus hir Designe-Produite ginn.

4 Joer laang war d’Bréck hannert der grousser Baatsch verstoppt. Wou de Marc Scheer, vun der asbl Cooperations, matkritt huet, datt een déi Baatsch recuperéiere kann, war zimlech séier kloer, datt ee kreative Projet dobäi entstoe kéint.

Zesumme mat der Designerin Julie Conrad sinn d'Iddie fir d'Marque "Dono" entstanen. Déi éischt Kollektioun mam Numm "E Stéck vun der Bréck" besteet aus enger Posch, engem Rucksak an enger Luucht. Der Designerin, déi sech selwer och ganz vill fir Upcycling interesséiert, war et virun allem wichteg stabil, multifunktionell a facettëräich Produiten ze kreéieren.

An engem protegéierten Atelier vu Cooperations, wou d’Leit mat engem Handicap schaffen, gëtt d'Baatsch verschafft an assuréiert esou och nei Aarbechtsméiglechkeeten.

Mam Projet "Dono" soll virun allem nohalteg geschaf ginn, esou datt d'Stéck vun der Bréck eng éischt Kollektioun ass, mä wou sécherlech nach weider Projete wäerten entstoen, wou mat recuperéiertem Materialien ka geschafft ginn.

Bis e Sonndeg ass de Pop-Up-Store am Casino an der Stad, wou een dann och an engem Atelier gesäit, wéi d’Produiten entstinn.

© RTL Télé Lëtzebuerg


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.