VIDEO: Esch 2022Transparenz amplaz Chaos, en Escher Virsaz fir d'neit Joer

D'Coordinateure vun Esch 2022 huelen d'Propos vun de Gemengen un, elo mol zäitlech limitéiert fir 6 Méint, un der Organisatioun weiderzeschaffen.

Transparenz amplaz Chaos, en Escher Virsaz fir d'neit Joer (16.12.2017)
D'Coordinateure vun Esch 2022 huelen d'Propos vun de Gemengen un, lo mol zäitlech limitéiert fir 6 Méint, un der Organisatioun weider ze schaffen.

Esch 2022: Et geet nees virun / Reportage Monique Kater



D'Buergermeeschtere vun Esch, Diddeleng an Déifferdeng haten der Asbl en Dënschdeg dës Propos gemaach. Fir Rou an dee ganzen Dossier ze kréien, misst méi kommunizéiert ginn a virun allem misst een d'Gemenge méi an d'Aarbecht mat abannen.

E Samschdeg de Moien war eng Reunioun mat engem vun de Coordinateuren, den Andreas Wagner huet och am Numm vu senger Kollegin Janina Strötgen d'Missioun ugeholl, déi 11 Gemenge genee iwwert den Dossier an d'Bild ze setzen.

De 9. Januar fänke mer u mat schaffen an als éischt wäerten déi 11 Gemenge kontaktéiert an iwwer alles informéiert ginn, seet den Andreas Wagner, Coordinateur fir d'Kulturjoer Esch 2022 – am Kloertext heescht dat, dass hien a seng Aarbechtskollegin averstane sinn, mam zäitlech limitéierte Kontrakt, deen d'Gemengen hinne proposéiert hunn. Fir déi nächst 6 Méint ass d'Mandat vu béide Coordinateuren dat heiten: d'Struktur ausschaffen an intensiv no bannen a bausse kommunikéieren. Grad wéi d'Buergermeeschtere weist och den Andreas Wagner sech erliichtert, dass et elo weider geet.

Extrait Andreas Wagner



Vertraue wier do, confirméiert den Andreas Wagner, dorunner schéngt och d'Durée déterminée vum Kontrakt, déi 6 Méint also, näischt ze änneren. D'Posten nei ausschreiwe Jo oder Nee – dës Polemik läit wuel ad acta. Transparenz wär elo wichteg an dat Gemauschels misst ophalen, wann dat gutt géing klappen, da kéint een och weider schaffen, sou den Andreas Wagner.

De 9. Januar geet et also lass, mat voller Transparenz. Den Escher Buergermeeschter, Georges Mischo, freet sech doriwwer. A Punkto Kommunikatioun an awer och am Beräich vum Konzept an der Struktur hätt een dem Andreas Wagner an dem Janina Strötgen d'Doléancë virgeluecht an elo wär et un hinnen dat ëmzesetzen, sou nach de Georges Mischo. 

Et ass e Kulturjoer fir déi ganz Regioun, fir de Süden, an dofir musse mir dat hei och zesummen upaken, sou nach den Escher Buergermeeschter.

D'Asbl mécht dann och hir Dieren op fir méi Memberen, virun allem aus Gemengen an dem Kulturministère, deen der 40 vun de 70 Milliounen Euro am Budget iwwerhëlt. All Säit wier bereet, a vollem Vertraue weider ze schaffen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.