VIDEO: Golden Globes 2018"Three Billboards Outside Ebbing, Missouri" beschte Film

An der Nuecht op e Méindeg goufen zu Los Angeles d'Golden Globes iwwerreecht an e staarkt Zeeche géint de Sexismus an der Filmbranche gesat.

D'Equippe vum Film "Three Billboards Outside Ebbing, Missouri".© AFP
Den däitsche Realisateur Fatih Akin huet säin éischte Golden Globe gewonnen. Säin Thriller "Aus dem Nichts" gouf zu Los Angeles als beschten net-engleschsproochege Film ausgezeechent. Déi däitsch Actrice Diane Kruger spillt hei eng Fra, där hire Mann mat kurdeschen Originnen an hire Fils vun Neonazien ëmbruecht ginn. Si wëll di Schëlleg zur Rechenschaft zéien. D'Diane Kruger war schonn d'lescht Joer beim Filmfestival zu Cannes als bescht Actrice ausgezeechent ginn. De Film "Aus dem Nichts" ass och fir en Oscar nominéiert.



Als eng vun de beschten Actrice gouf iwwerdeems d'Frances McDormand fir hir Roll am Film "Three Billboards Outside Ebbing, Missouri" ausgezeechent. Do virdrun war de Film vum iresche Regisseur Martin McDonaph schonn als beschte Filmdrama mam Golden Globe geéiert ginn. D'Frances McDormand spillt an dësem Film eng Mamm, déi géint d'Police virgeet, nodeems hir Duechter ëmbruecht ginn ass. Si reprochéiert der Police inkompetent ze sinn.

Bescht Komedie gouf "Lady Bird" vun der amerikanescher Regisseurin Greta Gerwig.

Als beschten Acteur gouf de britesche Schauspiller Gary Oldman fir seng Roll am Film "Darkest Hour" eng éischte Kéier a senger Carrière mat engem Golden Globe ausgezeechent. Hie verwandelt sech an dësem Film an de fréiere britesche Premierminister Winston Churchill.

Beschten Animatiounsfilm gouf "Coco".



#meetoo: Och bei de Golden Globes gouf op Sexismus opmierksam gemaach


Fir d'Zeremonie vu de Golden Globes hu vill Staren dëst Joer en Zeeche gesat géint sexuelle Mëssbrauch an der amerikanescher Filmindustrie. Déi meescht Schauspiller waren déi Kéier ganz schwaarz ugedoen. Souwuel Frae wéi Männer hunn op faarweg Kleeder verzicht. Ausléiser vun de Protester war de Skandal ronderëm den amerikanesche Filmproduzent Weinstein, deen iwwer honnert Frae soll sexuell belästegt a souguer vergewaltegt hunn.

Och an de Rieden hu sech eng Rei Prominenter géint Seximus a fir d’Gläichstellung vu Fraen ausgeschwat. Esou huet beispillsweis d’Oprah Winfrey annoncéiert, hannert dem Horizont géif eng nei Zäit fir Meedercher a Fraen ubriechen.

Golden Globes: Vill Gewënner an Aktioun géint Sexismus (08.01.2018)
An der Nuecht op e Méindeg goufen zu Los Angeles d'Golden Globes iwwerreecht an e staarkt Zeeche géint de Sexismus an der Filmbranche gesat.

Wéi war Lëtzebuerg vertrueden?
"Phantom Thread", an deem d’Vicky Krieps matspillt, war zweemol nominéiert mam Jonny Greenwood fir bescht Musek an Daniel Day Lewis fir beschte Schauspiller.


Aus Lëtzebuerger Siicht sinn awer nach 2 Nominatiounen ze notéieren.

Bei den Animatiounsfilmer fënnt een “The Breadwinner” (Mélusine Productions/Studio 352/ Stephan Roelants). De Film ass eng kanadesch-iresch-lëtzebuergesch Koproduktioun. 2/3 vun den Animatioune goufen hei zu Lëtzebuerg realiséiert.

De Film ass iwwregens net manner wéi 10 mol fir d’Annie Awards nominéiert, dee gréisste Filmpräis fir d’Animatioun.


An dann ass d’Palme d’Or 2017 fir de beschten auslännesche Film nominéiert. Dat ass “The Square” vum schwedesche Realisateur Ruben Östlund. De Film huet awer och e Lien mat Lëtzebuerg. Den David Grumbach, C.E.O vu Bac Films, deen de Film distribuéiert, wunnt a schafft hei am Grand-Duché.



Hei eng komplett Lescht vun allen Nominéierten a Gewënner:

Golden Globes.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.