SproocheronnZu Esch gouf iwwer d'Lëtzebuergescht diskutéiert

Déi eng wëlle méi Lëtzebuergesch an de Spideeler, déi aner liesen ze vill däitsch Ausdréck an eiser Sprooch, nees anerer stéiere sech um Franséischen ...

© Carine Lemmer
Zu Esch ass en Donneschdeg den Owend iwwert d'Lëtzebuergesch diskutéiert ginn.

Et war den zweete vun am Ganze 4 Biergerforumen iwwert eis Sprooch, déi den Educatiounsministère uechter d'Land organiséiert.

Et kann ee mat diskutéieren, seng Meenung soen, Propose maachen. Soen, wat engem uewe läit, wann et ëm d'Lëtzebuerger Sprooch geet.

Eng 30 bis 40 Leit hunn zu Esch an der Kulturfabrick dovunner profitéiert - d'Carine Lemmer war bis lauschteren.

"Sproocheronn" zu Esch: Reportage Carine Lemmer



De Minister Meisch huet e kuerzen Exposé gemaach, erkläert, ëm wat et geet, de Kultur-Staatsekretär Guy Arendt war och zu Esch derbäi an huet – wéi déi meescht am Sall – nogelauschtert. Nogelauschtert wat e puer ze soen haten. De Lex Roth, deen am Public war, hat vill ze soen: "Gitt sichtbar!" geet guer net, dat muss heeschen "Weist Iech", zu 90% géife muttwëlles däitsch Wieder erageholl ginn.

Et wär gutt, datt eng Sprooch sech wandelt, huet eng Fra geäntwert; si bräicht net ze schwätze wéi viru 50 Joer.

Anerer stéieren sech un ze vill Franséischem. Munch ADR-Member huet d'Wuert gefrot, fir seng Suergen ze formuléieren.



Eppes, wat vill Leit beschäftegt, ass dat villt Franséisch an de Spideeler - an de Klinicke misst "eis Sprooch" geschwat ginn, huet et ënnert anerem geheescht.

RTL soll och franséisch Extraiten iwwersetzen, hu Leit gemengt, well net jidderee géif gutt Franséisch verstoen.

D'Lëtzebuergesch op der Aarbechtsplaz misst valoriséiert ginn an an der Schoul richteg geléiert ginn.

Et geschitt scho vill, et geschitt net genuch – goungen d'Meenungen auserneen. Nationalistesch dierft d'Diskussioun net gefouert ginn, ass och gemengt ginn ... D'Sprooch wier eppes Schéines, domat soll ee keng Ängschte vun de Leit alimentéieren.

De Guy Arendt an de Claude Meisch hunn den Austausch begréisst – an hunn och nei Iddie kritt. Déi eng oder aner Propos wier interessant gewiescht, zum Beispill Lëtzebuergesch am virtuelle Raum ze definéieren, esou de Claude Meisch. A Verschiddenes wier wuel och ouni grouss Problemer ëmzesetzen, huet de Guy Arendt gemengt.



D'Remarke fléissen elo an de Fërderprogramm fir d'Lëtzebuergesch mat an, deen nach virun der Summervakanz an der Chamber soll gestëmmt ginn. Nach zweemol kann een och op de Biergerforume matdiskutéieren - oder online op sproocheronn.lu.

Déi lescht zwou Sproocheronne:

- Munneref, Bierger- a Kulturhaus: Donneschdeg, 15. Mäerz ëm 19 Auer
- Dikrech, Al Seeërei: Dënschdeg, 20. Mäerz ëm 19 Auer

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.