Aus ProtestDe Marius Müller-Westernhagen gëtt seng 7 Echoen zeréck

Nom Klaus Voormann, dem Notos Quartett an Igor Levit huet och de Marius Müller-Westernhagen seng Echo-Präisser zeréckginn.

© AFP
De Westernhagen zielt zanter bal 50 Joer zu enge vun de gréissten däitsche Museker, huet iwwer 16 Millioune Placke verkaf an tëscht 1992 an 2017 am Ganze 7 Echoe gewonnen. Déi gëtt hien elo fräiwëlleg nees zeréck.

Nom Eklat ëm d'Auszeechnung fir déi 2 Rapper Kollegah a Farid Bang leet de Westernhagen kee Wäert méi op dëse Präis.




De Pianist Igor Levit gëtt säin Echo-Präis zeréck

Och fir de Pianist Igor Levit wier d'Decisioun den 2 Rapper en Echo ze ginn e komplett irresponsabele Feeler vun der Jury. Et wier gläichzäiteg och den Ausdrock fir den aktuellen Zoustand vun eiser Gesellschaft. Antisemitesche Parolen esou eng Plattform an eng Auszeechnung ze ginn, wier net z'erdroen.

Den Igor Levit hat den Echo-Klassik 2014 kritt.




Lescht Woch en Donneschdeg ware béid Rapper mam Musekspräis fir den Album "Jung, Brutal, Gutaussehend 3" ausgezeechent ginn, deen als antisemitesch kritiséiert gëtt. Do fënnt een zum Beispill Textpassage wéi: "Mein Körper definierter als von Auschwitzinsassen» an nach «Mache wieder mal 'nen Holocaust, komm' an mit dem Molotow».

De Pianist ass net deen Eenzegen, dee säi Präis zeréckginn huet. Virdrun war et schonn de Museker a Grafiker Klaus Voormann, deen den Echo ganz rezent fir säi Liewenswierk kritt hat. Och de Notos Quartett vu Berlin huet des Decisioun geholl. De Sänger Peter Maffay huet donieft gefuerdert, dass déi Responsabel missten zerécktrieden.

De Bundesverband "Musikindustrie" huet, am Kader vun de Protester annoncéiert, d'Konzept vum Präis z'iwwerschaffen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.