Lëtzebuerger Auteur a PolitikerCornel Meder am Alter vun 79 gestuerwen

De gebiertege Rëmelenger war tëscht 1987 an 2003 Direkter vum Staats- a spéider dunn vum Nationalarchiv.

Hie war och Däitsch-Professer a Lycéesdirekter am Lycée Technique Mathias Adam.

Zanter Mëtt der 60er Jore war de Cornel Meder nieft sengem Schreiwe besonnesch am Editiounswiesen aktiv. Hien huet Publikatiounen wéi d'Magasinnen "doppelpunkt" a "Galerie" gegrënnt an erausginn. Als Auteur hunn him besonnesch Kuerzgeschichte geleeën.



De Cornel Meder huet och de Literaturzenter zu Miersch matgegrënnt. Am Juli zejoert sot hien am Kader vum Summerdag vun der Literatur am RTL-Interview wéi wichteg Liesunge fir hie waren.

De Cornel Meder am Juli zejoert



Summerdag vun der Literatur (02.07.2017)
Vun 11 bis 17 Auer ginn et Liesunge vun an Interview mat Schrëftsteller am Park vum Literaturarchiv zu Miersch.


De Cornel Meder war Member an enger ganzer Partie Fondatioune a Stëftungen wéi De Minettsdapp, de Cercle des Amis de Colpach an dem Institut grand-ducal.

De Minetter war och politesch aktiv. De Cornel Meder souz vun 1981 un fir d'LSAP am Déifferdenger Schäfferot a war tëscht 1994 an 2002 an der Gemeng Kultur- an Ëmweltschäffen.

Vun 1977 bis 1999 war de Verstuerwene Member am Staatsrot.

Eng Reaktioun vum Lex Roth

De Cornel Meder ass an d’Éiwegkeet gaang. Hie war en intelligente Mann. Hie war deer positiver ‘Wibbeleger’ een; net ëmmer kamoud, mä zolitt a senger Meenug a ferm a sengem Schaffen. Fir eis Sproochaarbecht ass hien ëmmer dogewiescht an och zäiteweis Member vum Comité vun der Actioun-Lëtzebuergesch. Seng Publikatiounen iwwer de Spoo an de Michel Rodange bleiwe Standardstécker fir all déi, déi sech ëm d’Lëtzebuergescht bekëmmeren. Cornel, e ganz perséinleche Merci fir Deng apaart Frëndschaft!

Lex Roth

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.