Nei Aufgaben an der Schnëssen-AppVu Kaweechelcher, Aperhoer a Lëlldicher

Mat der App wëll den Institut fir lëtzebuergesch Sprooch- a Literaturwëssenschaft vun der Uni.lu d'Lëtzebuerger Sprooch vun haut dokumentéieren.

D'Schnëssen-Ekipp ass zréck mat enger 3. Ronn an hirer App. Nodeems ee bei deenen zwou éischte Ronne scho bei insgesamt 200 Items seng Äntwert an d'App schnësse konnt an op dës Manéier schonn net manner wéi 183.000 Opname gesammelt goufen, ginn elo nees sou vill wéi méiglech Participantë gesicht, déi bei der neier Ronn matmaachen.

80 nei Aufgaben, dorënner och proposéierter

Dës Kéier ginn et eng 80 nei Aufgaben, bei deenen d'Participantë ënnert anerem erëm benenne sollen, wat si op engem Bild, dat hinnen ugewise gëtt, gesinn. Sou gesäit een dann zum Beispill e Bild vun Aperhoer – oder sot Dir vläicht éischter "Apelhoer", "Aperen" oder nach anescht? Nieft de Biller ginn et och eng sëlleche Sätz ze iwwersetzen. Bei enger Aufgab soll ee beispillsweis de Saz "Im Hotel freut sich kein Gast über alte Bettlaken" op Lëtzebuergesch soen, woubäi ee sécherlech dierft gespaant sinn, wéi vill Leit hei éischter "Läindicher", "Läilecher" oder "Lällecher" soen.



Doriwwer eraus ginn d'Participanten dës Kéier ënnert anerem gefrot, wéi si dofir soen, wann et liicht, a (villen) klengen Drëpse reent. An egal, ob et elo "fisemt" oder "fiselt": Och an dëser Ronn gëtt et rëm keng "richteg" a keng "falsch" Äntwerten. D'Zil vun der App ass et nämlech, all méiglech Bezeechnungen a Variante vum haitege Lëtzebuergesch ze sammelen. Fir déi nei Aufgabe goufen iwwregens och erëm Propose berécksiichtegt, déi d'Participanten um Enn vun de jeeweilege Ronne gemaach hunn.

Och Froebéi an der App

Nieft der ganzer Rëtsch nei Aufgaben, déi zanter Kuerzem an der App sinn, fënnt een ënnert der Rubrik "Froebou ausfëllen" verschidde Froebéi iwwert d'Lëtzebuergescht, fir déi d'Ekipp vum Schnëssen-Projet och weiderhi méiglechst vill Participantë sicht.

Weider Artikelen iwwer d'Schnëssen-App, mat der Summerserie iwwer ausgewielte Wierder.



Dir wëllt matschnëssen?
"Schnëssen" ass déi éischt App, fir d'Lëtzebuerger Sprooch vun haut an all hire Facettë mat Toun-Opnamen ze erhiewen an ze dokumentéieren. D'App ass Deel vun engem Projet vum "Institut fir lëtzebuergesch Sprooch- a Literaturwëssenschaft" op der Universitéit Lëtzebuerg. Et geet drëm, d'Lëtzebuerger Sprooch an hirer ganzer Bandbreet, also mat hiren Dialekter, ze erfaassen.

Weider Artikelen iwwer d'Schnëssen-App, mat der Summerserie iwwer ausgewielte Wierder.

D'App ass ganz spilleresch opgebaut, esou geet et zum Beispill drëm ze beschreiwen, wat een op engem Bild gesäit oder eppes ze iwwersetzen. Esou soll gesammelt ginn, wat alles am Lëtzebuergesche virkënnt, e Richteg oder Falsch gëtt et do net, et geet ëm d'Erhiewe vun Daten respektiv Donnéeën, net ëm d'Verbesseren oder d'Virschreiwen. Dat ass zum Beispill och bei der Fro nom "Auto(s)festival" esou - wéi een et ausschwätzt, ass egal: D'Fuerscher wëlle just erausfannen, wéi vill Prozent d'Variant mat s a wéi vill déi ouni s benotzen ... Déi eenzel Äntwerte ginn opgeholl an un d'Uni geschéckt. Dat mécht d'App vum selwen. De Set vu Biller a Froe gouf iwwer de Summer och schonn erweidert.

D'App Schnëssen – Är Sprooch fir d'Fuerschung gëtt et fir iOS an Android. Se ass gratis.



Facebook: https://facebook.com/schnessen
Twitter: https://twitter.com/schnessen
Internet: https://infolux.uni.lu/schnessen
E-Mail: schnessen@uni.lu

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.