VIDEO: Serie Music AwardsTom Gatti: Museker a Museksproduzent

De Bassgittarist vu MAD FOX huet och zanter 3 Joer e Museksstudio mam Numm "Audio Oak".

Mat hirem Titel “Bubbel”  huet d’Band “MAD FOX” de Präis fir “Song of the year” op de Luxembourg Music Awards gewonnen. D’Band gëtt et schonn zanter gutt 6 Joer an ënnert hinnen ass och de Bassgittarist a Musiksproduzent Tom Gatti.

Zanter 3 Joer huet hien de Museksstudio mam Numm “Audio Oak”. Hie schafft mat e puer Kënschtler aus dem Ausland, ma déi meescht kommen awer aus Lëtzebuerg.

Mat 16 Joer huet hie sech Gittar spille selwer bäibruecht an huet a verschiddene Bands gespillt, deemools éischter hobbyméisseg. 2006 huet hie bei Eternal Tango ugefaangen, Bass ze spillen. 2012 ass d’Band dunn awer am Gudden ausernee gaangen. Parallel ass de Projet MAD FOX scho gelaf, deemools nach ënnert dem einfache Numm “Fox”.

Fir déi no Zukunft huet den Tom nach verschidde Pläng. Ënnert anerem all seng Lidder verschaffen, déi nach net opgeholl goufen. E Solo-Projet wëll hien dat awer net nennen, ma hien huet éischter d'Iddi fir eng Compilatioun ze maachen, mat anere Kënschtler. Ausserdeem stinn nach puer Pläng un, fir als Songwriter oder als Museker a Bands matzewierken. Wat a wou genee wollt en eis awer nach net verroden, ma et dierf ee gespaant sinn, wat 2019 an duerno nach alles vum Bass-Gittarist / Musiksproduzent komme wäert.


Georges Goerens: Nieft "Seed to tree" och "Bartleby Delicate"



Zanter gutt 8 Joer ass de Georges Goerens scho mat “Seed to tree” an der Lëtzebuergescher Musekszeen aktiv. Virun 2 Joer dunn, koum seng Decisioun ,och Solo e Projet ze starten. Entstanen ass de “Bartleby Delicate”. Bei de Luxembourg Music Awards huet hien dofir en Award fir “Best Upcoming Artist” gewonnen.

Fir säi Kënschtlernumm huet de Georges sech um Herman Melville sengem “Bartleby the Scrivener” inspiréiere gelooss. Eng Kuerzgeschicht, déi sech ënnert anerem och mat Philosophesche Froen ausernee sëtzt a vill Interpretatiounsspillraum léisst. Fir seng Texter léisst hie sech u Bicher, perséinlechen Erliefnisser, mä och un der Musek vun anere Kënschtler inspiréieren.

Nieft der Band “Seed to tree” a sengem Solo Projet, mécht hien och nach e Master an der Theaterwëssenschaft. De Bachelor huet hien zu Freiburg an der Philosophie gemaach. Seng Zukunft gesäit hien awer egal wéi an der Musek.

"C'est Karma": Nei EP soll am Fréijoer op de Marché kommen



Den 18. Dezember sinn d'Luxembourg Music Awards verdeelt ginn. Eng vun de Gewënnerinnen dëst Joer war d’Karma Catena mat sengem Projet “C’est Karma”. Déi 17 Joer al Kënschtlerin konnt d'Jury mat hirem Lidd "Nicole" iwwerzeegen. Momentan schafft si un enger EP, déi am Fréijoer soll op de Marché kommen.

Dem Karma säi musikalesche Wee huet mat der klassescher Gei ugefaangen. Dobäi ass et awer net laang bliwwen an iergendwann huet d’Musekerin sech d'Gittarspille selwer bäibruecht. Spéider ass de Gesank dobäi komm a kuerz drop huet déi jonk Kënschtlerin sech als Stroossemusekerin probéiert, bis dunn de Projet “C’est Karma” entstanen ass, deen dëst Joer ee Joer kritt.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.