Concours littéraire national 20171. Präis geet un d'Anja Di Bartolomeo fir "Chamäleons"

De Kulturministère huet d'Laureate vum nationale Literaturconcours vun dësem Joer annoncéiert.

Den 1. Präis dëst Joer ass fir d'Anja Di Bartolomeo fir "Chamäleons". De Bernd Marcel Gonner gëtt fir "Volk der Freien" mam zweete Präis geéiert an déi drëtte Plaz ass fir "Stürze aus unterschiedlichen Fallhöhen" vum Elise Schmit.

"Übertragungsneurosen" vum Claire Schmartz ka sech iwwert den 1. Präis an der Katagorie "Jeunes auteurs"  tëscht 15 a 25 Joer freeën.

Concours littéraire / Reportage Roy Grotz



De Jury huet sech duerch d'Kuerzgeschichte vun dësen 3 Auteuren dëst Joer iwwerzeege gelooss.

Déi virop derzou gefouert hunn, datt den éischte Präis an der Kategorie vun den erwuessenen Auteuren dëst Joer un d'Anja Di Bartolomeo fir d'Manuskript Chamäleons geet. Wéi et dem Jury no heescht wier et e Recueil vu Geschichten, déi gutt openeen ofgestëmmt sinn a wou d'Sprooch immens präzis a pointéiert wier, sou datt Personnagen a Plot nach méi géifen an hirer Besonnechkeet erauskristalliséiert ginn. Et wiere räich Geschichten, wou vill dra wier, mee näischt ze vill mat originelle Wuertspiller, Metapheren an Uspillungen. Den éischte Präis domat wéi gesot fir Chamäleons vum Anja Di Bartolomeo, déi 2011 d'Erzielungen "Exit Schattenkopf" eraus ginn hat, dat deemools op der Leipziger Buchmesse presentéiert gi war.

An der selwechter Kategorie ass deen zweete Präis fir de Bernd Marcel Gonner fir de Recueil "Volk der Freien", wou d'Erzielstruktur als komplex, experimentell an onkonventionell beschriwwe gëtt. D'kryptesch Portraiten an den Opbau op méi Niveaue géife beim Liesen awer vill Konzentratioun verlaangen, sou de Jury ënnert der Presidentin Valerija Berdi.

Schonn d'lescht Joer hat de Bernd Marcel Gonner den éischte Präis an der Kannerliteratur kritt, fir "Pirat oder Seeräuber sterben nie".

Den drëtte Präis da geet un d'Elise Schmit fir "Stürze aus unterschiedlichen Fallhöhen", wou detailléiert, intimistesch Beschreiwungen de schaarfen Observatiounssënn vun der Schrëftstellerin géifen ausdrécken. Klenge Bémol: leider wieren net all d'Geschichte vun där selwecht héijer Qualitéit, sou de Jury.

An en éischte Präis geet och u jonk Auteuren tëscht 15 a 25 Joer: deen ass dëst Joer fir d'Claire Schmartz an de Recueil "Übertragungsneurosen", wouranner ganz sensibel géifen zwëschemënschlech Relatiounen thematiséiert ginn. De Stil wier sober a knapp, wat dem Rhythmus géif gutt doen. D'Sujete wiere mat originellen Perceptiounen duergestallt, wat dem Wierk Spannung an e gudde Flow géif ginn.

Den nationale Literaturpräis gëtt de 6. Dezember am nationale Literaturzenter zu Miersch iwwerreecht. De Concours gëtt zanter 1978 vum Kulturministère organiséiert, mam Zil, déi literaresch Kreatioun am Grand-Duché ze fërderen.

Hei den offizielle Communiqué:

Résultats du Concours littéraire national 2017 (10.11.2017)

Communiqué par: ministère de la Culture

 

Le ministère de la Culture a le plaisir d'annoncer que le jury du Concours littéraire national 2017, composé d’Angelika Bräutigam, de Jérôme Jaminet, de Ludivine Jehin, d’Anne-Marie Millim, sous la présidence de Valerija Berdi, vient de primer les recueils de récits suivants:

  • Chamäleons de Anja Di Bartolomeo, 1er prix de la catégorie «auteurs adultes»;
  • Volk der Freien de Bernd Marcel Gonner, 2e prix de la catégorie «auteurs adultes»;
  • Stürze aus unterschiedlichen Fallhöhen de Elise Schmit, 3e prix de la catégorie «auteurs adultes»;
  • Übertragungsneurosen de Claire Schmartz, 1er prix de la catégorie «jeunes auteurs de 15-25 ans».

Les prix ont été motivés par le jury comme suit:

1er prix de la catégorie «auteurs adultes»: Anja Di Bartolomeo: Chamäleons (langue: allemand)

E Recueil vu Geschichten, déi gutt openeen ofgestëmmt sinn an awer eng aussergewéinlech Diversitéit un Themen opweisen. Originell an iwwerraschend Figuren, mat enger iwwerzeegender Charakteriséierung, déi d’Lieser an hire Bann zéien.

D’Sprooch ass immens präzis, glaskloer a pointéiert, wouduerch d’Personnagen an de Plot nach méi an hirer Besonneschheet erauskristalliséiert ginn. Ganz faszinant sinn déi kleng ageflecht Detailer, déi mol irritéieren, well een net weess, wou et higeet, déi awer zu der Spannung bäidroen an ee reegelrecht an d’Geschicht versenken dinn.

Et si räich Geschichten, et ass vill dran, awer näischt ze vill. Eng Rei originell Clin-d’oeilen a Wuertspiller, Metapheren an Uspillungen. D’Autorin geet awer ganz geschéckt dermat ëm. Alles ass perfekt ausbalancéiert an den ëmmer erëm präsente subtillen an intelligenten Humor gëtt den Erzielungen eng Liichtegkeet, ouni datt dobäi d’Déift verluer geet.

De Stil an d’Dramatik vun den Erzielunge bleiwe permanent op engem héijen Niveau, wat op gutt Schreiffäegkeeten hindeit, an déi onerwaart Open-ends suergen derfir, datt een och nom Liesen nach eng Zäitchen un der Geschicht hänke bleift.

An dee stëmmege Recueil si praktesch keng onangenehm Stolpersteng agebaut an den Opbau vun de Geschichten ass ganz ronn; si paken ee vun Ufank un, sinn iwwerraschend an originell, vum Plot a vum Stil hier.

2e prix de la catégorie «auteurs adultes»: Bernd Marcel Gonner: Volk der Freien (langue: allemand)

E Recueil vun Texter, deen net just inhaltlech, mee virun allem sproochlech besonnesch op sech opmierksam mécht. Déi ausgewielten Erzielstruktur ass komplex, experimentell an onkonventionell, wat de Geschichten eng aussergewéinlech Kraaft gëtt. Déi kryptesch Portaiten an dee villschichtegen Opbau verlaange vill Konzentratioun. D'Diktioun entsprécht der Zäit an dem Raum vun der Zeenerie, wat e mageschen Effekt mat sech bréngt. Eng reng Ästhetik a subtil Poesie, ergräifend Beschreiwungen, duerchwuess mat Literaturzitater a Verweiser op d'Bibel, üben eng grouss Faszinatioun aus.

3e prix de la catégorie «auteurs adultes»: Elise Schmit: Stürze aus unterschiedlichen Fallhöhen (langue: allemand)

Eng Kompositioun aus ënnerschiddleche Stiler mécht dëse Recueil zu enger besonnescher Lektür. Detailléiert an intimistesch Beschreiwunge verweisen op e messerschaarfen Observatiounssënn. Virun allem do, wou d’Sprooch méi kompriméiert ass, iwwerzeegt d’Autorin mat Originalitéit a Finess.

D’Entwécklunge vun den eenzelen Erzielunge sinn uspriechend, well se vill Déift hunn an duerch dee kontrasträichen Opbau an d'Zesummesetzung verweilt een och gäre méi laang bei den eenzele Fragmenter. Leider sinn net all Geschichte vun därselwechter héijer Qualitéit.

1er prix de la catégorie «jeunes auteurs de 15-25 ans»: Claire Schmartz: Übertragungsneurosen (langue: allemand)

Ganz sensibel ginn hei tëschemënschlech Relatiounen thematiséiert. Eng gelonge Charakteriséierung vun de ProtagonistInnen, déi mat vill Empathie duergestallt ginn. De Stil ass ganz knapp, sober an deskriptiv gehalen, wat dem Plot vun den eenzele Geschichten en angenehme Rhythmus gëtt. D’Erzielunge weisen op eng duerchduecht Maturitéit hin, sou datt ee gewëss Stilfeeler verzeie kann. D’Sujete ginn oft mat iwwerraschende Wendungen an originelle Perceptiounen duergestallt, wat fir Spannung an e gudde Flow suergt.

La remise officielle des prix aura lieu le mercredi 6 décembre 2017 à 19 h 30 au Centre national de littérature à Mersch, 2 rue Emmanuel Servais.

Depuis 1978, le ministère de la Culture organise un concours littéraire annuel ayant pour but d'encourager la création littéraire au Grand-Duché de Luxembourg. Chaque année, le Concours littéraire national est réservé à un genre littéraire différent. L’édition 2017 était réservée au recueil de récits en langue luxembourgeoise, française, allemande et/ou anglaise.


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.